Hemsereka Konseya Rayberdişî ya KCKyî Besê Xozat bernameyê taybetî yê Medya Haber TVyî de rojdem ercna.

Qiseykerdişê Besê Xozat ra  tay noqtayê girîngî wina yê:

''Hemleya 'Rayber Apoyî rê Azadîye, Meseleya Kurdan rê Çareserîye' resaye astêka girînge û bîye globale. Ewro pêro dinya wayîra Rayber Apoyî vejîyena. Çunke xeta Rayberîye bîya xeta xoverdayîşî. No xoverdayîş bi komelkî. Bi taybetî çalakîyanê sey Rayraşîyayîşê Azadîye ra dima Hemleya Azadîye aver şîye. Ancî Rayraşîyayîşê Kolnî yê 17ê sibate zî zaf girîng bi. Seba prosesê komelbîyayîşê hemle nê çalakîyî bîyî destpêk.  Nika zîndanan de grevê vêşanîye û teber de Nobetê Edaletî est ê. Nê zî a raşte parçeyêkê Hemleya Azadîye yê. Xoverdayîşê gerîlayan zî xora serkêşîya hemle keno. Nika hemle ver bi astêka girînge şina û do biba hemleyêka girseyî. 

Rayber Apo binê tecrîdêkê giranî de yo. Dewleta tirke tecrîdê Îmraliyî vera şarê kurdî sey hacetêkî û malzemeya tehdîtî şuxilnena. Ge ge prosesanê weçînayîşan de derheqê Rayber Apoyî de fekê îqtîdar û muxalefetî ra qisey vejîyenê. Nê kenê ke bi nê hawayî rayanê kursan bigêrê. Ê zî hêzê Rayber Apoyî hol zanenê. Eke Îmrali de huqûq bêro caardene Tirkîya de zî do bêro caardene. Rewşa Îmraliyî rewşa Tirkîya mojnena. Nika îqtîdarî amadekarîyan keno ke weçînayîşan ra pey şerêkê neweyî bido destpêkerdene. No zî seba ke hemle bêra qelskerdene yeno kerdene. 

Newroza 2024î Newrozanê tewr heybetînan ra yewe bîye. Bi mîlyonan merdiman meydanî dekerdî.  Emser bi taybetî Vakurê Kurdîstanî û Tirkîya de şayîyê xurtî ameyî kerdene. Şarê kurdî şarê Newroze yo. Yanî şarê kurdî vera zulmî, îşxalî, faşîzmî, teda sereyê xo wedarneno. Ma dî ke şarê kurdî şarê Newroze yo. La şarê Newroze do tirkan zî bikero şarê Newroze. Newroze  de vera şerî, tecrîdî, polîtîlayanê şerê taybetî û konseptê înkar û îmha mesajî girîngî dîyayî. Seke zanîyeno 8 serrî yo dewleta tirke û îqtîdarê AKP-MHPyî Planê Çokdayîşî anê ca. La nê planî bîyî sebebê çokdayîşê înan. Meydananê Newroze de şarî na raştîye mojna û bi xurtî vat ke Rayber Apo îradeyê şarê ma yo. Bi şayîyanê heybetînan ê Newroze  prosesê xoverdayîşê komelkîyî dest pêkerdo. Ma pê bawer ê ke şarê ma do bi ruhê Newroze ser bikewo.

Binê atmosferê şerî de weçînayîşî benê nêzdî. Şarê ma wazeno weçînayîşan de şaredarîyanê xo apey bigêro. Eşkera yo ke îqtîdar ancî do muracatê hîleyan bikero. Xora 8 serrî yo bi sîstemê qeyûman Kurdîstan de şer yeno kerdene. Nika dewlete vera sîyasetê kurdan Hîzbulkontrayan zî kena dewre. Huda-Parî cayêkê sey Dêrsimî de namzed veto. Dêrsim merkezê elewîyanê Reqa Heqî yo û tede Terteleyê 38î amebi kerdene. 

Hetê bînî ra bi nê kerdişan vera sîstemê ma yê hemserekîye zî hêrişî yenê kerdene. Dewlete û îqtîdar dişmenê cinîyan ê û wazenê sîstemê xo her ca de serdest bikerê. Vera nê ferasetî ganî cinîyî bi xurtî têkoşîn bikerê. Heta ke cinîyî azad nêbê komel zî azad nêbeno. Cinîyî ganî bi xurtî wayîrê sîstemê hemserekîye û destkewteyanê xo yê bînan vejîyê.

Dewleta tirke emser Herêmanê Pawitişî yê Medya de kilîdkerde mende. Rixmê destekê PDKyî zî artêşa tirke ya îşalkere bi gerîlayanê ma nêeşkaye. Îsraîl Filîstîn de se keno, dewleta tirke zî Rojawan û Başûrê Kurdîstanî de ey kena. Dewleta tirke wazena Kurdîstanî îşxal bikera û sînoranê Mîsak-i Mîllî bîyarê ca. Seba ney zî sere de cerganê DAÎŞî pêro hêzan şuxilnena. Nika dewleta tirke xîret kena ke YBKyî û Iraqî sey PDKyî daxîlê plananê xo hê îşxalî bikera. Xeta PDKyî xeta îxanetî ya. Ma pê bawer ê ke Iraq na xete ra nêşoro.''