Dewleta tirke ya îşxalkere 17ê nîsane ra nata hêrişê Herêmanê Pawitişî yê Medya kena. Hemsereka Konseya Rayberdişî ya KCKyî Besê Xozat derheqê babete de cewab da persanê Yeni Ozgur Politika.

Qiseykerdişê Xozate ra beşêk wina yo:

''Hînî eşkera yo ke mabênê PDK û Tirkîya de tay pêkerdişî-peymanî yenê kerdene. Xora zanîyeno ke gaz û petrolê Başûrî serê Tirkîya ra do bêro berdene bi Ewropa. Xora PDKyî cara petrol û gazê Başûrî rotêne Tirkîya. Mabênê înan de peymana 50 serre est a. Dewleta tirke wazena na peymane reyde Başûrî û Rojawanî îşxal bikera û biresa sînoranê Mîsak-i Mîllî. Seba ke dewlete verê nê plananê xo de PKKyî sey astengîye vînena wazena verî PKKyî çin bikera. PDK zî paştî dana plananê îşxalî yê Tirkîya.  Aseno ke înan pêkerdo ke Başûrî bikerê wîlayetêkê Tirkîya. Eke wina bibo dewleta tirke Barzanîyan ra yew sey walîyî tayînê nê wîlayetî bikero.

Nika pê destekê PDKyî dewleta tirke xeylê cayê Başûrî îşxal kerdo. Dewleta tirke baregehanê Başûrî ra yena, operasyon kena. PDK zî bi her hawayî îstîxbarat, lojîstîk, îmkanê resî dano Tirkîya. Yanî PDK bi hawayêkê aktîfî mîyanê nê hêrişanê îşxalî de ca gêno.

Balkêş o ke Mesrûr Barzanîyî pêvînayîşê Erdoganî ra dima Îngilîstan de zî tay pêvînayîşî kerdî. No çi rolê Îngilîstanî zî eşkera keno. Mesrûr Barzanîyî seba ke plananê îşxalî bikero Erdogan dî. Mesrûr pê qiseyê 'Iraq beno ke bibo konfederasyonê xeylêk dewletan' wazeno raştîye binimno. Hetê bînî ra no qisey planê 'Başûrî bibo wîlayetêkê Tirkîya' zî eşkera keno.  Mesrûr seba ke Başûr bi temamî Iraqî ra cîya bibo û pabesteyê Tirkîya bibo wina vano. Xora nika Başûr seke wîlayetêkê Tirkîya yo. PDK dewaya kurdan nêkeno. Keyeyê Barzanîyan têna menfaatanê xo paweno.

Kamca de dewleta tirke nêeşkaye bikewa ci PDK hêzanê xo Zêrevan, Gulan û Roje şaweno. Nê hêzî rayîr û dormeyê gerîlayan gênê, danê gerîlayan ro. Dewleta tirke koyan, PDK zî rayîr, gelî û kendalan tepişeno. PDK verê yewîya neteweyîye ya kurdan û demokrasîya Başûrî de astengêk o. Eke sere de YNK partîyê kurdan ê Başûrî vera PDKyî têkoşînêkê xurtî yê demokrasî bikerê polîtîkayê PDKyî do bêtesîr bimanê û dewleta tirke do nêeşka Başûrî îşxal bikera.

Şarê Başûrî û sere de  YNK, Gotan û Tevgerî xeylêk partî û hêzanê Başûrî vera hêrişanê îşxalî û hemkarîya PDKyî tewirêko tûj mojna. No zaf ercîyaye yo. Ganî şarê ma vera îşxalkeran bi hawayêkê topyekûnî wurzo payan ser û partî, dezgeh û înîsîyatîfî zî serkêşîya ney bikerê. Tarîx her kesî ra mesuldarîyêka winasêne wazeno. 

Hêrişanê îşxalî yê bi paştdayîşê PDKyî de bi seyan dewê Başûrî ameyî vengkerdene, şar maruzê hêrişanê kîmyewîyan mend, erd û zengînîya Başûrî hetê dewleta tirke ra ameyî talankerdene. Barzanîyî pê pereyê şarî xo rê her cayê dinya de mal û mulkî gênê la şarê Başûrî vêşan o. Başûr de zîret rijîyayo, bêkarîye asta tewr pîle de ya, şîdetê vera cinîyan zêdîyayo, karmendan rê meaş nêdîyeno. PDKyî Başûr kerdo bazarê erzanîye yê Tirkîya. PDK seba ke raştîyan mevajê pêro muxalîfan bêveng keno û erzeno zîndanan. 

Eşkera yo ke rejîmê Îranî zî pê polîtîkayanê PDKyî qayîl nîyo coka vera fuzeyan erzeno Hewlêrî. Hetê bînî ra PDKyî destûr da ke Başûr de baregehê NATO, CIA, MIT, MOSSADî ca bibê. Îran nê çîyan ra qayîl nîyo. Îran Başûr de estbîyayîşê Tirkîya, Amerîka û Îsraîlî û destekê PDKyî yê bi înan xo rê sey gefêkî vîneno.''