Gerîla Ararate bi mureyanê xo yê dergan, bi vengê xo yê weşî gerîlayêka serhedije bîye. Wexto ke mi kameraya xo akerde vazdaye ameye verê mi. Şehîdanê Heftanînî ra Welat Dêrik û a binê darêke de pabeyê mi bîyî. Ez şîya hetê înan. Vat: ''Ewro 27ê kanûne yo, ma do seba PKKyî deyîran vajê û roja ke kurdî azad bîyî fîraz bikerê. Ti eşkena dîmenanê ma bigêra?'' Mi zî înan rê vat: ''Xora eşkena, na kamera seba şima ya.'' Mi cade bi kelecanî kameraya xo akerde û deyîre înan girewte.

A hele yena mi vîrî, dara ke ê binê ci de roniştbî, kelecanê înan. Gerîla Ararate wexto ke eşnawit a şina Heftanîn vat: ''Embaze ez şina erdê hewt rengan, cayê varan, vewre, daranê rindan. Ez şina Heftanîn kam zî wazeno wa bêro.'' Gerîla Welat Dêrik reyde bi kelecanî kewte rayîr. No kelecan û waştiş seba şerî bi. Seba bawerîya cuya azade bi. Nika wirdî zî bîyî çerê gerîlayî û şerwanê Heftanînî.

Fedayîtî, çêrî, îrade, waştiş, rûmet û berzîya şehadetî qanûnê cuya azade yê. Nê çêrê pîlî bire danê ke senî şehîd bibê. Wexto ke vera dişmenî şer kenê qet bawerîya xo ra tawîz nêdanê.

Gerîla Ararate verê cû  xeylêk waranê gerîlayan de rastê îşxalkeran ameye. Heftanîn seba ci bi cayê bêmergîye. Bi xoverdayîşê xo îşxalkerî poşman kerdî. Ararate xo bi renganê Heftanînî xemilna.

25ê hezîrane de Ararate warê Şeşdara de mintiqaya Tunelî de vera dişmenî şer kerd û gerîla Esmere û Bêrîvane reyde aver şîyî. Verê dişmenî girewt. Hema zî xîret kerdêne ke Şeşdara de aver şora. Xoverdayîşê gerîlayanê YJA-Starî uca de sey kerrayêke ronişte zerrîya dişmenî.