Qezaya Bismilî ya Amedî de 2021 de xebata rijnayîşê qereqolêkî dîyabî destpêkerdene. Ame tesbîtkerdene ke wextê xebata kepçeyan de binê qereqolî de esteyê merdiman ameyê dîyene.

Karkeranê xebate esteyî teslîmê Mudirîya Park û Baxçeyan a Şaredarîye kerdî la dima aqîbetê esteyan nêzanîya. Dima ke esteyî ameyî dîyene xebata rijnayîşî vinderte û warê esteyan pê betonî, bi lezî ame qefilnayene.

Goreyê zanayîşanê ke ameyê girewtene tay kesan derheqê esteyan de qeyûmê Bismilî Orhan Ayazî rê telefon kerd la Ayazî gahaîye nêdaye çewî. 

Şahîdêk/a ke nêwaşt nameyê xo eşkera bikero/a îfade kerd ke esteyî zereyê yew kartonî de hetê Mudirîya Park û Baxçeyan a Şaredarîye ra teslîmê îmamê şaredarîye ameyê kerdene û îmamî zî bi nimitkî esteyî defin kerdê. Şahîdî/e da zanayene ke bi îxtîmalêkê pîlî nê esteyê aîdê ê kesanê ke 90an de cînayetanê faîlî-meçhulan de ameyê kiştene.

Bismil de 1992 û 1994 de JÎTEM û Hîzbullahî xeylêk kesî kiştî û dima ke remnayî kerdî vînî. Goreyê dokumentanê ke Fermandarîya Cendirmeyan a Lîcê amade kerdê û serranê 2000an de vejîyê werte, Bismil de xeylêk dewijî bi îdîaya 'PKK dir eleqeyê înan est o' ameyê qeydkerdene û na lîste ra 13 kesî dima ameybî qetilkerdene yan zî vînîkerdene.

Fermandaranê Komandoyan ê Bismilî ra Îzzet Curalo ke o çax cînayetê JÎTEM û Hîzbullahî serûber kerdêne, bi seyan kesî dayî koçkerdene, dew û banê şarî vêşnayî. 

Kesê ke mabênê serranê 1988 û 1994î de Bismil de ameyê vînîkerdene nameyê tayînan wina yê:Abdulkadir Kurt, Muhlîs Akbulut, Arap Guven, Îsmail Tunç, Ozeyîr Kurt, Musa Koluman, Şehmus Yuksel û Turgut Yenîsoy, Mahmut Çakmak, Şehmus Çelîk, Cahit Ozalp, Salhattîn Akbulut û Sadık Kortak.

Nînan ra têna gorê Îsmaîl Tunç û Arap Guvenî ameyî dîyene la aqîbetê 11 kesanê bînan nêzanîyeno.