Teyarayanê artêşa Iraqî 16ê adara 1988î de saete 11.00 de şaristanê Helebçe yê Başûrê Kurdîstanî de pê çekanê kîmyewîyan 5 hezar kurdê sivîlî kiştî û nêzdîyê 10 hezar helebçeyîjî birîndar kerdî.

Rojnameger û nuştox Alî Mahmoudo ke seba muhakemekerdişê sûcanê qirkerdişî warê mîyanneteweyî de xîret keno, derheqê Qirkerdişê Helebçe de ANFyî rê qisey kerd.

Alî Mahmoudî ard ziwan ke hema zî Helebçe verê çimanê ci de yo û vat: ''Ganî Helebçe vîran ra nêşoro. Iraq û Îran pîya mesuldarê nê qirkerdişî yê. Seddam ame dardekerdene la ganî Helebçe qanûnê Iraqî de  sey qirkerdişêk bişinasîyo û kurdan ra uzr bêro waştene.

16ê Adare ra verî PDK, YNK, Partîya Sosyalîste û Partîya Îslamî ya Kurdîstanî hêzê Îranî dawetê Helebçe kerdî,  kerd ke Îran na herême destê Iraqî ra bigêro. Netîce de hêzê Îranî rayberîya Qasim Silêmanîyî de kewtî Helebçe. Ganî kurdî sebebê Qirkerdişê Helebçe hol bizanê.

Seddam pê hîsê qesasî Helebçe de têgêra û 16ê Adare ra verî Kanî Eşqan û Helebçe serûbin kerd, xeylêm merdimî darde kerdî. 1974 de uca de bombayanê Nepalmî ra xeylêk kesî kişîyabî. Saddam sey dişmenî ewnîyayêne Helebçe rê û uca de têgêrayîşê artêşa Îranî ci rê bi bahaneya qirkerdişî. 16ê Adare ra verî zî Helebçe zaf reyî bibi hedef la a roje tewr tay 5 hezar sivîl, kokim, cinî û domanî pê gazanê kîmyewîyan kişîyayî.

Xeylê şîrketê Almanya, Fransa, Belçîka û Amerîka bîyî hemkarê Seddamî. Ma 13-14 reyî gerreyê şîrketanê Almanya kerd la netîceyêke nêvejîyaye. Ewropa de dewaya Helebçe seba ke hemkarîya înan bêra mîyankerdene bênetîce vera dîyayî.

Wextê îdamî de ma nêwaşt Seddam Huseyîn bêro dardekerdene. Hesabê Enfal û Helebçe mehkeme de tira ame  perskerdene. La o hêrs bi. Goreyê mi seba ke qirkerdişê Helebçe roşnî nêbo cade o ame dardekerdene. Seddamî zaf reyî Amerîka rê xizmet kerd. Pê dardekerdişê Seddam û û Alî Hasan el-Mecîd (Kîmyasal Elî) mesajê 'serê na mesele bigêrê' dîya.

Xîretê ma yê seba muhakemekerdişê şîrketanê ke madeyê kîmyewî rotî Saddam bênetîce mendî. La ma rê tecrube bi. Ganî vera sûcdaranê Helebçe û Enfalî dewa bêra akerdene. Ganî hemkarê Seddamî yew bi yew bêrê muhakemekerdene û ceza bigêrê.''