Nêrazîbîyayîşê vera hêrişanê Tirkîya dewam kenê. Serekê Pêryoyî yê Partîya Demokrate ya Kurdîstanî-yê Vakurî Sertaç Bucakî îfade kerd ke seba ke şar bireso armancê xo ganî pîya tevbigêro û ard ziwan ke şarê ke pîya tevgêrayê ser kewtê.

Qiseykerdişê Bucakî wina yo: "Dinya ser o kesêk zî hêrişanê vera Rojawanî qebul nêkeno. Hêrişê vera Rojawanê Kurdîstanî vera huqûqê mîyannetweyî û huqûqê şerî yo. Rojawan qet seba Tirkîya nêbi tehlûke. Tirkîya wazena bi hêrişan demografîyê Rojawanî bivurna, wazena herinda kurdan de erebî ca bigêrê. Tirkîya de mesela kurdan esta û bi hêrişê vera Rojawanî na mesele bîye mesela dinya. Kurdê Rojawanî wazenê xo îdare bikê û cuyêka newîye saz bikê labelê Tirkîya hêrişê kurdanê Rojawanî kena. Eke babete kurdan yan zî statuyê kurdan biba seba Tirkîya bes o. Tirkîya statuyê kurdan seba xo sey tehlûke vînena. Tirkîya heta nika sîsyasetê xo kurdan ser o saz kerd. Tirkîya sey mesela asayîşî nêzdîyê kurdan bena. Naye ra seba ke kurdan parçe bika opersyonanê leşkerî kena. Labelê nê polîtîkayî şaş ê û ma nînan qet qebul nêkenê. Şarê ke pîya tevgêrayê ser kewtê. No seba kurdan zî wina yo. Seba serkewtişî têna rayîrêk esto ke o zî pîya tevgêrayîşê rêxistinan ê kurdan ê sîyasî yo. Ma şerêko mazlum ê. Ma kurdî dişmenê kesêkî nîyê. Ma zî wazenê ke sey her komelî bi hawayêkê têdûştî û azadî biciwîyê. Rewşa Başûr û Rojawanê Kurdîstanî çiman ver de ya. Eke Rojhelatê Kurdîstanî de zî çîyêk biqewimîyo ez pê bawer a ke Tirkîya hêrişê ucayî zî bika. Çimê ma erdê kesî de nîyo, têna ma wazenê erdê xo ser o biciwîyê. Seba naye zî yewîya neteweyî şert a."