Hemşaredara Sûrî ya Amedî Fîlîze Buluttekîna ke herinda ci de qeyûm amebi tayînkerdene derheqê kerdişanê qeyûmî de ANFyî rê qisey kerd.

Buluttekîne tayînkerdişê qeyûman sey parçeyêkê sîyasetê înkar û îmha pênase kerd. Buluttekîne da zanayene ke bi rayîrê destnayîşê şaredarîyan vera têkilîya komelî ya bi sîyasetî hêriş ameyo kerdene.

Buluttekîne vat: ''Bi tayînkerdişê qeyûman şarê ma bêxizmet mend. Wexto ke qeyûmî ameyî şaredarîyanê Kurdîstanî de karê cinîyan, ekonomî, ekolojî û kulturî qedîyayî, herinda nînan de zî kerdanê jenerekerdişî ameyî. Bi qeyûman xîret ame kerdene ke cinî û ciwanî warê sîyasetî ra dûrî bivisîyê. Rejîmê qeyûmî hacetanê polîtîkayanê înkar û îmha ra yew bi. Bi nê sîyasetî ame armanckerdene ke komel erjanê xo ra fek vera bido û dejenere bibo.''

Buluttekîne vist vîrî ke qeyûman ra verî şaredarîyanê Kurdîstanî de karê cinîyî zaf aver şîyî la qeyûman nê pêro kar û xebatî betal kerdî. Buluttekîne vat: ''Îqtîdar bi rejîmê qeyûmî wazeno cinîyan keye de heps bikero. Bi rejîmê qeyûmî, seba nê armancî mudirîyê cinîyan, merkezê kulturî yê cinîyan ameyî qefilnayene.''

Buluttekîne bale ante ser ke hêrişê vera mîrasê kultur û tarîxê Sûrî mîsalêkê hêrişanê qeyûmî yo. Buluttekîne vat: ''Her cayê Sûrî de warêkê rantî virazîyayo. Îhaleyê ke Sûr de yenê kerdene, seke seba faydeyê şarî yo yenê mojnayene. La nê îhaleyî seba hîna zengînkerdişê tay kesan yenê kerdene.''