Roniştişê dewaya qetilkerdişê Kemal Kûrkûtî de raporê Buroyê Krîmînalî yê Mîyanneteweyî ame eşkerekerdene. Ame vatene ke polîsê bi nameyê Y.Ş. rasterast Kûrkût kerdo hedef. Dadgehî tewqîfkerdişê polîsê qetilkarî red kerd.
Roniştişê 5’ine yê dewaya wendekarê unîversîte Kemal Kûrkût o ke Newroza 2017'î ya Amedî de hetê polîsan ra amebi kiştene Mehkemeya Cezaya Girane ya Amedî ya 7’îne de ameye dîyayene. Derheqê polîso verguman Y.Ş. de sucê “bi kiştişê qestî” ra bi cezkerdişê muebetî dewa ameyêbî akerdene.
Verê roniştişî zaf polîsan der-dorê bînaya edlîyeye girewt. Polîso verguman Y.Ş. yo negrewte avûkatê xo reyde ame edlîye. Hetê bînî ra zî birayê Kûrkûtî, Ferhat Kûrkût û avûkatê keyeyî roniştiş de amade bîyî. Parlamenterê HDP'yî yê Amedî Semra Guzele, Dêrsim Dage û Mûsa Farisogûllari û rayberê HDP'yî zî dewa temaşe kerde. Tewr kêmî 30 polîsî zî kewtî salona roniştişî û dewa temaşe kerde.
Roniştişî de heyetê dadgehî da zanayene ke raporê Buroyê Krîmanalî yê Mîyanneteweyî yê derheqê kiştişê Kûrkûtî de ameyo amadekerdene reşto destê înan. Avûkatanê Kûrkûtî zî da zanayene ke raporo ke ameyo, nêkewto destê înan.
Serekê dadgehî beşê peyênî de ard ziwan ke polîso verguman o bi nameyê Y.Ş, Kemal Kûrkût kerdo hedef û bi guleyî panayo. Ropor ra ame zanayene ke Kurkut kerdo hedef.
Avûkatanê keyeyî Kûrkûtî, ard ziwan ke polîso ke nika yeno muhakemekerdene nêameyo tewqîfkerdene û şertê kontrolê edlî ra ameyo verdayene. Avûkatan vat, ganî polîso verguman bêro tewqîfkerdene. Avûkat Cîhan Aydin zî ard ziwan ke verguman hîna zî karê xo dewam keno û beno ke verguman delîlê ke estê, werte ra wedaro.
Heyetê dadgehî da zanayene ke endamê asayîşî yê cayê bîyayîşî de ganî reyna sey şahîd berê goştaritene û raporê Buroyê Krîmînalî de tayê çîyê kêmî estê û ganî raporêko hîna hîra bêro amadekerdene. Heyetê dadgehî dima roniştiş taloq kerd.
