Qirkerdişê 33 Guleyan ser ra 78 serrî derbaz bîyî ke qezaya Qelqelî ya Wanî de qewimîya. Dewlete semedo ke têkilîya kurdanê Rojhelat û Vakurî bibirna 33 dewijê kurdî qetil kerdî. Ewro zî heman sebebî ra dês virazîyeno.
78 serrî verrrî 30ê temmuza 1943î de 33 dewijê ke destê înan girê dîyabî kişta Çemê Sefoyî de serê sînorê Îranî de pê fermanê Orgeneral Mustafa Muglaliyî dîyabî guleyan ver, ameyî qetilkerdene. No qirkerdiş bi îdîaya 'qeçaxçîtîye' ame kerdene. Qirkerdişî ra têna dewijêk xelisîya û 7 serran ra dima qala qirkerdişî kerde. Naye ser o Kişlaliyî rê cezaya dardekerdişî dîyaye dima ceza vurîyaye muebede.
Serê sînorî ke tede Qirkerdişê 33 Guleyan ame kerdene Walîyê Wanî M. Emîn Bîlmezî pare kerd ke seba ke pêro sînorê Rojhelat-Vakurî de dêsî virazîyê înan dest pê xebate kerd.
Dewijê herême qedexeyan ra semed nêeşkenê erazîyanê xo yê zîretî biramê, şorê dewanê xo. Nika zî mabênê înan û erazîyan de dês virazîyeno.
Dewa Sirimli ya qezaya Sarayî sînorî ra xeylêk nêzdî ya. Dewijê ke Qirkerdişê 33 Guleyan de ameyî qetilkerdene zêdêr na dewe ra yê. Leşkeran dest nayo erazîyanê dewijan ser. Cîzeyîr Ozkaplano ke merdimê ci qirkerdiş de kişîyayî pare kerd ke Qirkerdişê 33 Guleyan hema zî vîrê înan de yo û vat:
''33 merdimê ma yê bêguneyî ameyî qetilkerdene. Hukmatî vurîyenê la dewlete mende ya. Ma waştêne dewlete ma ra uzrê xo biwaza la herinda uzrî de mabênê ma de dês virazena, ma kena mexdûr. Nêmeyê şarê Saray û Qelqelî tornê ê merdiman ê. Ganî tîya de vîrdarîa 33 Guleyan ronîyo. Ma hînî nêeşkenê şorê cayê Qirkerdişê 33 Guleyan. Ma tîya de heywankarîye û zîret kerdêne la nika nêeşkenê. Eke dês virazîyo qasê 500 metreyan do bikewo erazîyê ma. O çax karê ma binî ra qedîyeno.
Mabênê ma û Rojhelat de Berê Kapikoyî esto la o zî bi serran o girewte yo. Dewleta wazena ma yewbînan ra bi temamî abirna. Serê sînorî ra bi hezaran multecîyê afganî derbaz benê yenê la ma nêeşkenê heywananê xo zî biçarnê. Ma nêeşkenê dewa xo ra vejîyê.''
Endamê Meclîsê Partîye yê Partîya Herêman ê Demokratîkan Ejder Ekîncîyî da zanayene ke no dêsê mabênê Rojhelat û Vakurê Kurdîstanî desêko polîtîk o. Ekîncîyî vat: ''Serê sînorî de polîtîkaya dişmenîya vera kurdan yena caardene. Na polîtîka bêguman meseleyanê şarî hîna kena giranêr. Bingeyê viraştişê nê dêsî de meseleya kurdan esta. No dês polîtîkaya asayîşî eşkera keno la na polîtîka hînî do nêeşka kurdan ser o netîce bigêra.''
