Sema Yuce adara 1998î de Zîndanê Çanakkale de çalakîyêke kerdbî û 17ê hezîrana 1998î de zî şehîd bibî. Embazê aye yê têkoşînî Endamê Komîteya Merkezî ya PKKyî Cemal Şerîkî ANFyî rê qala Sema Yuce kerde.

Şerîkî Zîndanê Çanakkale de Sema Yuce şinasnabî û wextêkî înan pîya têkoşîn kerdbi. Şerîkî dîyar kerd ke Sema Yuce qetî bêedaletîye qebul nêkerdêne.

Şerîkî vat: ''Mi embaze Sema Yuce 1993 de Zîndanê Çanakkale de şinasnaye. Ma Zîndanê Bursa ra erşawîyabî Zîndanê Çanakkale. Tewirê embaze Sema Yuce her kesî ra cîya bi. Aye qiseykerdiş û ganîbîyayîşê ci de merdim eşkayêne nînan bivîno. Aye şîîrî nuştêne û şîîrêka xo de vatêne 'Ez Zekîye Alkan ra bîya.' Zekîye Alkan zî 90an de Sûranê Amedî de çalakîyêke kerdbî û çalakîya aye dewrêk dabi destpêkerdene. Embaze Sema çalakîya embaze Zekîye sey dadîrabîyayîşê aye pênase kerdbi. No dadîrabîyayîş qewimîya bi çalakîya Sema Yuce.

Embaze Sema Yuce zîndan de zî serkêşîya tepişteyan kerdêne. Aye raporêk şawitbi û rapor de pêşnîyaz kerdbi ke wa zîndan de konferansê cinîyan bêro kerdene. Pêşnîyazê ci ame qebulkerdene û embazanê cinîyan zîndan de konferans kerd. Embaze Sema Yuce konferans de serkêşîye kerde. Embaze Sema Yuce çalakîya xo ra verî mektubêk şawitbi û mektub de vatêne ke a wazena mabênê 8ê Adare û Newroze de çalakîya xo bikera û mabêna înan de biba pirdêk. O çax sloganê 'Jin Jiyan Azadî' resa manaya xo ya raştikêne.

O çax embaz Fîkrî Baygeldî zî Zîndanê Çanakkale de bi. Ey seba Sema Yuce vatbi 'Ganî leşkerî peyê fermandaranê xo de şorê.' Ey embaze Sema sey serkêşe û fermandare qebul kerde û rayîrê aye zî sey rayîrê xo dî û çalakîya xo ya pîle kerd.

Tarîxê ma yê têkoşînî de kesê serkêşî yê sey embaze Sema zaf ê. Ganî şar nê kesan xo rê mîsal bigêrê. Seba cuyêka azade û rûmetêne ganî xeta Sema Yuce ewro bikewa dewre. Embaze Sema Yuce mîyanê şertanê zîndanî de erk û mesuldarîyê xo ardî ca. Ma seba azadîye têkoşîn kenê. Ma sey aye zîndan de zî nîyê. Ganî ewro kadro û milîtanê PKKyî serê rayîrê embaze Sema de xo bikerê milîtananê serkêşan. Ganî ma goreyê tewirê aye tewir û çalakîyanê xo biweçînê. Embaze Sema rayîrî mojnena ma, erkî dana ma. Ganî ma goreyê ney têbigêrê.''