Endamê Komîteya Merkezî ya PKKyî Cemal Şerîkî 1ê Gulane Roşanê Karker û Kedkaran ANFyî rê ercna. 

Şerîkî qiseykerdişê xo de verî 1ê Gulane yê pêro kedkaran û kesan fîraz kerd û şehîdî yad kerdî.

Qiseykerdişê Şerîkî ra beşêk wina yo:

''Nê prosesî de Kurdîstan û Tirkîya zaf nêzdîyê azadîye û demokrasî yê. Dîktatorîya AKP-MHPyî her wextî ra zêdêr qels a û hê rijîyena. Coka têkoşîno hempar ê şaranê Kurdîstan û Tirkîya do na dîktatorîya faşîste binî ra birijno. 

Hayîya dîktatorîye pê na raştîye esta coka vengo berz ê 1ê Gulane ra, yewîya şaran ra tersena. Seba ke verê 1ê Gulane bigêra qedexeyan îlan kena, sere de bahaneya Korona zaf bahaneya afernena. Seke oyo ke kongreyê pîlî kerdî Erdogan nîyo, şayîyanê 1ê Gulane asteng keno. La kedkar û karkerî pê bahaneyanê Erdoganî nêxapîyenê.

Îqtîdaro faşîst ê AKP-MHPyî pê zaneno ke şar, bindestî, cinîyî, ciwanî, sosyalîstî, şorişgêrî, karkerî her serre ra zêdêr emser waran do pirr bikerê. Coka qedexeyê îqtîdarî asta tewr berze de yê. La şarî û kedkarî amadekarîya 1ê Gulane ra fek vera nêdanê. Şaranê Kurdîstan û Tirkîya hînî fam kerd ke AKP-MHP pê têkoşînê înan ê hemparî do birijîyo.  Şarî Newroze û 8ê Adare de no mojna.

Şarî pê na qerardarîye amadekarîya 1ê Gulane kenê û ê do waran pirr bikerê. No do vera îqtîdarî bibo cewabêko tewr raşt. 

1ê Gulane binê şertanê wehşîyan ê kapîtalîzmî de vejîya werte. Kedkarî 12-16 saetan xebitîyayêne, sîgoortaya înan çînbî û heqê destê xo nêgirewtêne. Mîyanê nê şertan de kedkaran hîşmendîya sinife awan kerde û xo rêxistin kerd. Dima zî înan derbe daye sinifa burjuva ro û pê xoverdayîşê xo saeta xebate kerde 8 saetan.

Nika Kurdîstan û Tirkîya de kolonyalîzmê kapîtalîzmî bi hawayêkê tewr wehşî qewimîyeno. Karkerî pê vêşanîye yenê terbîyekerdene. Şaredarîyan de karkerî karî ra yenê vetene, pê KHKyan xebatkarê umûmîye karî ra yenê vetene. La karkerî vera nê kerdişanê AKP-MHPyî xo ver danê. 1ê Gulane yê 2021î do xoverdayîş û qirayîşê karkeran biresno asta tewr berze.

1ê Gulane têna roja kedkar û karkeran nîya; roja têkoşînê vera faşîzmî ya. Şarê Kurdîstanî têkoşînê azadîye de israr kerd û xeylêk destkewteyî vistî destî. Ewro kes nêeşkeno estbîyayîşê şarê kurdî înkar bikero. Kurdîstanijî nê têkoşînî de destê xo way û birayanê xo yê tirkîyayîjan rê derg kenê. Eke no dest bêro tepiştene şarê Tirkîya do bireso azadîye û demokrasî.

Coka şarê kurdî mîyanê Têgêrayîşê Şorişê Yewbîyayeyî  de ca gêno. Kurdî wayîrê mîrasêkê pîlî yê û înan zaf bedelî dayî, şehîdî dayî. Ewro Kurdîstan de gerîlayê azadîye û şarê kurdî pîya mîyanê têkoşînî de ca gênê. Coka 1ê Gulane yê 2021î yeno manaya servistişê Hemleya Wextê Azadîye. Ganî esasê na raştîye ser o şorişgêr, sosyalîst, demokrat, azadîwaştox û antîkapîtalîstê Kurdîstan û Tirkîya waranê 1ê Gulane pirr bikerê. Na mesuldarîyêka tarîxî ya nê kesan a.

Na mesuldarîye ganî bêra caardene. Emser zî ma do waranê 1ê Gulane pirr bikerê, rayraşîyayîşê xo aver berê. No wezîfeyê ma yo.''