Abdullah Karadumano 16 serre yo ke 7ê nîsan a 2016î wextê qedexeyê tebervejîyayîşî yê qezaya Nisêbînî ya Mêrdinî ame qetilkerdene, cenazaya ci badê şeş serran dîyaye keyeyê ci.

Keyeyê Karadumanî bi serran o semedê girewtişê cenazaya lajê guruyeno. Bado ke netîceya DNA safî bi, keyeyî vizêr reyna muracatê Serdozgerîya Komare ya Mêrdinî kerd û cenazaya xo waşte. Dima ra saetanê erey de cenaza Goristanê Artukluyî ra ameye girewtene.

Cenazaya ke bi konvoyî ameye berdene Nisêbînî,  dekewtişê qeza de hetê polîsan ra gerîyaye binê ablûqa. Polîsan wesayîtê cenaza mîyanê konvoyî ra vet û destûr nêda teberê keyeyê ci çew tewrê merasîmê definkerdişî bibo. Polîsan waşt wa her kes vila bo la şar vera polîsan vejîya dormeyê goristanî de pawit. Canazaya Abdullah Karadumanî Goristanê Hecace yê taxa Kişla de hetê keyeyê ci ra ameye definkerdene.