Cenazayê gerîlayanê ke tarîxê cîya-cîyayî de şehîd bîyê, nêweşxaneyanê Mêrdîn û Şirnexî de tepişîyenê. Keyeyî seba girewtişê cenazayan muracat kenê la bi bahaneya 'testê DNA nêvejîya' cenazayî nêdîyenê înan. Nê cenazayan ra yewe zî cenazaya gerîlayê HPGyî Musa Anter Çatakî ya ke 8ê gulane de Koyê Bagokî yê Mêrdînî de şehîd bi û cenazaya ci zî Nêweşxaneyê Dewlete yê Mêrdînî de yo. Gerîlaya YJA-Starî Bîşenge Hezera ke 3ê gulane de şehîd bîye morgê Nêweşxaneyê Dewlete yê Şirnexî de tepişîyena.

 Dadîya Bîşenge Ayşe Hezer pare kerd ke aye televîzyonî ra musaye ke kênaya ci şehîd bîya û vat: ''Ez pê na xebere zaf dejîyaya. Wa keyeyî şorê cenazayanê xo bigêrê, wa nêverdê ke cenazayî tûtanê ci goristanê bêkesan de bêrê definkerdene.''

Dayîke Ayşe Hezer îfade kerd ke dima ke kênaya ci şehîd bîye leşkeranê tirkan têlêk milê ci ra girê da û erdî ra cenaza kaş kerde. Dayîke Ayşe vat: ''Înan cenazaya kênaya mi rût kerda û erdî ra kaş kerda. Dîmenê ney zî înan hesabanê xo yê medyaya dîjîtale de pare kerdî. Mi milê ci ra kênaya xo şinasnaye. Ez cade şîya Nêweşxaneyê Şirnexî. Înan vat cenaza uca de nîya. Mi vat ez gonîye bida la înan nêverda. Vateyê avûkatê ma ser o înan dima mi ra gonîye girewte. Eqsê vateyê înan xebatkaranê morgî vat morg de cenazayêka rûte esta. La mi kerd nêkerd înan cenaza nêmojnaya mi. Ez pê qehrî agêraya keye. Her kes zaneno ke kênaya mi û embazê ci pê gazê kîmyewî kişîyayê. Dîmenan de aseno ke cenazayan ser o rêçê guleyan çin o. Eqlaxê şima, wijdanê şima çin ? Şima çira cenazayanê ma nêdanê ma?''

Babîyê Musa Anter Çatakî Saît Çatakî zî eşkera kerd ke mengêk a cenazaya lajê ci nêdîyena înan û vat: ''Lajê mi 8ê gulane de Bagok de şehîd bi. Leşkeran mi rê telefon kerd vat 'Cenazaya lajê to Mêrdîn de yo, bêre gonîye bide.' Ez û cinîya mi ma şîyî Mêrdîn û ma gonîye daye. Ma wazenê cade cenazaya xo bigêrê. Ma waşt pê rayîrê avûkatan cenazaya xo bigêrê la dozgerîye vat cenaza nêşinasîyena û waştişnameyê ma red kerd. Yê lajê mi reyde 3 cenazayê bînî nêweşxaneyê Mêrdînî de tepişîyenê. Ma cenazayanê xo wazenê û heta ma cenazaya xo nêgêre ma do nêvinderê.''