Sîyastemedaro kurd Mehmet Zelî Çelebîyo ke 17ê gulane de şaristanê Silêmanî yê Başûrê Kurdîstanî de netîceya hêrişê çekdarî de ame qetilkerdene, Wan de binê abluqaya polîsan de ame definkerdene.

Cenazaya Çelebîyî serê sibayî ameye berdene bi Wanî. Hêzanê dewleta tirke roja panceşemeyî ra nata rayîrê Goristanê Selîmbeyî girewtêne. Polîsan verê şaristanî de karwanê cenaza vindarna û keyeyî rê ferz kerd ke têna 15 kesî şorê goristanî.

Endam û îdarekarê HDP, DBP, Wekîlê HDPyî Murat Sarisaç, Muezzeze Orhan, Mehmet Siddik Taş û xeylêk kesî tewrê merasîmî bîyî la hetê polîsan ra ameyî astengkerdene.

Wekîl Sarisaçî astengkerdişê polîsan şermezar kerd û vat: ''Definkerdiş heqo meşrû yo. No kerdiş kamyew dîn de est o? Şima hem kurdan kişenê hem zî merdeyan rê zulm kenê. Ma do ney protesto bikerê.''

Wekîle Muazzeze Orhan zî îfade kerd ke polîsan bi astengkerdişê xo qebul kerd ke no cînayet hetê SADAT, JÎTEM û MÎTî ra ameyo kerdene û vat: ''Şima sûcî kenê. Şima de wijdan çin o?''

Mehmet Sidik Taşî vat: ''Kam bikişo o asteng keno.''

Dima mabênê polîsan û girseyî de alozîye vejîyaye. Girseyî bi sloganê 'Şehîdî nêmirenî' polîsî şermezar kerdî.

Birayê Çelebîyî Fevzî Çelebîyî vat: ''Birayê mi 13 serrî xerîbîye de bi, nika nêverdenê ma cenazaya ci defin bikerê. No zulm nîyo çi yo? Polîsî ma rê vanê 'Fekê xo amekerê.' Ma ney qebul nêkenê. Ganî hukmatî na hişmendîye ra fek vera bido. Dewlete tim hêrişê cenazayan kena. Mehmet Zekî Çelebî şehîdê pêro kurdan o.''