Cenazeya  tuto 6 serre Efe Tektekîno ke polîsan pê wesayîtê zirxînî cehdeyê Emekî ya taxa 5 Nîsane ya qezaya Rezanî ya Amedî kişt Goristanê Yenîkoyî de ame definkerdene.

Efe Tektekîno 6 serre yo ke 11’ê Êlule de qezaya Rezanî ya Amedî de wesayîtê zirxinî yê polîsan o eciqna bi û Nêweşxaneyê Fakulteyê Tipî yê Dîcle de ameyêne tedawîkerdene cuya xo vînî kerde. Dimayê otopsîya Nêweşxaneyê Dewlete yê Selahattîn Eyyûbî cenazeya Tektekînî Goristanê Yenîkoyî de ameye definkerdene.

Wexto ke cenaze morga nêweşxaneyê dewlete ra girewtêne Babî Ahmet Tektekînî  reaksîyon da polîsan ke pê wesayîtê zirxînî lajê ey kişto û va: "Wesayîtê polsîsan bi hewayêko eşkera lajê mi qetil kerdo. Lajê mi 6 serre bi, mêse û vizik nêbi. Çi gureyê wesayîto zirxîn tîya esto? Polîsan senî lajê mi uca de nêdîyo? Yew serre cuya ver zî wesayîtê TOMA roşnîya rengê sûrî de nêvindert û babîyê mi qetil kerd.
 

Şahidê serebûtî merdimê  Tektekînî ke nêwaşt nameyê xoeşkere bike zî serebût mojnayo û vat: "Hem kişenî û hem zî bêveng manenî. Polîsan şahidê serebûtî yê ke fotofrafî antî destbend kerdî." Keyeyê Efeyî otopsî ra pey cenazeya ey ardo Goristanê Yenîkoyî û tîya  vecîbeyanê dînî ra pey defin kerd.

Şaxa ÎHD'yî ya Amede zî derheqê serebûtî de îzahat da û va: "10 serrîya peyênan ra nata rîyê qezayanê wesayîtan ê zirxînan ra herême de 17 kesan dinyaya xo bedilnaye. Seba ke sucdarî nênê cezakerdene pê wesayîtanê zirxînan merdiman qetil kenî.

Pîrikê Efe Tektekînî Mehmet Tektekîn (85) zî 6'ê Hezîrana 2018'an de hetê wesayîtê TOMA  ra amebi qetilkerdene.