Cenazeyê 4 gerîlayanê HPG'yî  yê ke 3'ê Hezîrane de bejahîya Licê ya Amedî de şehîd bîyî, rixmo ke şehdadetê înan ser ra 4 mengî ravêrtî, hema zî teslîmê merdimanê înan nêbîyê. Cenazeyî vizêr Stenbolî ra  ameyî berdene bi Amed. Cenazeyê Îbrahîm Çelîk (Mahîr Andok), Abdûllah Tûrhan (Reber Amed), Omer Demîr (Serhildan Mazî) û Yûsûf Kayran (Zinar Akro)  morgê Nêweşxaneyê Gazî Yaşargîlî yê Amedî sey rehîn yenê tepiştene.

Bejahîya taxa Bayitlî ya qezaya Licê ya Amedî de , 2'ê Hezîrane de operasyonê leşkerî amebi viraştene. Teyarayanê şerî herême bombardûman  kerde. 4 gerîlayê HPG'yî nê hêrişî de şehîd bîyî û 4 mengan ra nata cenazeyanê înan nêdanê keyeyanê înan. Cenazeyê Îbrahîm Çelîk (Mahîr Andok), Abdûllah Tûrhan (Reber Amed), Omer Demîr (Serhildan Mazî) û Yûsûf Kayran (Zinar Akro)  cayê operasyonî de ameyî vindertene. Keye û şarî dimayê 44 rojan şîyê herême û cenazeyî herême ra girewtebî. Cenazeyî seba otopsî ardê Nêweşxaneyê Cigêrayîş û Perwedeyî yê Gazî Yaşargîlî yê Amedî. Keyeyî seba DNA'yî gonî daye, na reye zî Cenazeyî erşawitê Dezgehê Tipa Edlî yê Stenbolî. Dozgerî 27'ê Êlule de gêrayo keyeyan û parbe kerd ke testê DNA'yî eşkera bîyî. Dima cenazeyî pê teyara erşawitê morgê Nêweşxaneyê Yaşargîlî yê Amedî. Keyeyî seba ke cenazeyan bigêre muracatê Dozgerîya Komare ya Amedî kerd û dozgerî ê erşawitê Fermandarîya Cendirmeyan a Peyasî. Fermandarîya Cendirmeyan awil vat, "Ma cenazeyan dimayê nêmroje danê." Keyeyî şîyê verê nêweşxaneyî û heta şanî uca de vindertî. Selahîyetdaranê cendirmeyan bedo zî keyeyan rê vat: "Ma do mîyanê hewte de bidê şima."