Dewleta tirke ya îşxalkere bi hemkarîya PDKyî 17ê nîsane ra nata hêrişê Herêmanê Pawitişî yê Medya kena. Vera hêrişanê îşxalî yê dewleta tirke Komalanê Ciwanan venga pêro ciwanan dabi ke seferber bibê.

Goreyê xebera NûçeCiwanî naye ser o 50 ciwanê Rojawanê Kurdîstanî bi eşkerayîyêke tewrê refanê gerîlayan bîyî.

Eşkerayîya ciwanan wina ya:

''Koyanê Kurdîstanî de dewleta tirke ya îşxalkere û PDK vera gerîlayanê azadîye hêrişanê wehşîyan kenê. PKK 50 serrî yoo bi têkoşînê xo cewab dano nê hêrişan. Nika ê koyanê Kurdîstanî de teng bîyê û apey şinê.

Ê key wazenê şarê kurdî qir bikerê vera xo de PKKyî vînenê. Oyo ke vera DAÎŞî Rojawan pawit û Şorişê Rojawanî pawit PKK bi. Şingal û Başûr de zî PKKyî bê destûrê kesêkî vera DAÎŞî şer kerd. Gerîlayî seba kurdan sembolê estbîyayîş û haştîye yê. Coka dewleta tirke ya îşxalkere reyna verê xo da koyanê Kurdîstanî. 17ê nîsane de dewleta tirke û hemkarê ci PDKyî vera Avaşîn, Zap û Metîna hêrişê îşxalî dayî destpêkerdene. Înan pêro cerg, qoricî û teknîkerê xo seba qirkerdişê kurdan seferber kerdî.

Hêrişê vera koyanê Kurdîstanî, ganî sey hêrişanê qirkerdişî yê vera kurdan fam bibê. Dewleta tirke pê destekê NATO û PDKyî hêrişê gerîlayan kena, sere de çeka kîmyewîye û bombaya qedexekerde xeylêk metodan ceribnena. Rixmê ney zî gerîlayê azadîye û leşkerê Rayber Apoyî bi fedayîtî û israrî vera hêzanê NATOyî şer kenê û bêmabên derbanê giranan danê piro.

Ma zî sey ciwananê Rojawanî verê xo danê Zapî. Wexto ke DAÎŞî hêrişê Rojawan û Şingalî kerdbi gerîlayan ra ber çewî şarê kurdî û welatê xo nêpawitbi. Ma zî sey ciwananê Rojawanî xoverdayîşê gerîlayan xo rê mîsal gênê. Coka ma îlan kenê ke tewrê hemleya seferberîye ya têgêrayîşê ciwanan benê û tewrê gerîlayan benê.

Serra 50. ya serfîrazîya Rayberîye de ma sey 50 ciwananê Rojawanî verê xo danê koyanê azadan. Ma venga pêro ciwananê Kurdîstanî danê ke bêrê tewrê nê şerê serfîrazîye bibê.''