Hemserekê Rêxistina HDP'yî ya Amedî Zeyat Ceylanî ard ziwan ke bi hêrişê serê Îdareyê Xoserî yê Vakur û Rojakewtena Sûrîye wazenê têkoşînê Kurdan bifetisnê û vat, ganî ma firsendê tarîxî bixebitnê û yewîya xo saz bikê.
Tirkîya û çeteyanê ci OSO 9'ê Teşrîna Verêne de bi tang, top û teyarayan erdê Vakur û Rojakewtena Sûrîye rê hêriş kerd. Nê 17 rojan de Tirkîya bi DYA û Rûsya peymana adirbirnayîşî îmza kerde, reyna Tirkîya hêrişanê serê Vakur û Rojakewtena rê dewam kerd. Hêrişê ser herême roja 18'ine de zî dewam kenê. Bi taybetî hêrişê serê Başûrê Girê Spî û Rojakewtena Mîyanêne Serêkanîyê dewam kenê.
Hemserekê Rêxistina HDP'yî ya Amedî Zeyat Ceylan derheqê hêrişanê Tirkîya yê serê Îdareyo Xoser ê Vakur û Rojakewtena Sûrîye de û babeta Yewîya Neteweyî de qisey kerd.
Ceylanî va: ‘’Mesele û alozîya Sûrîye serra 2011 de dest pêkerde. Seba ke Kurdan komel rêxistin kerdibi, ne rejîm ne zî çetayan reyde ca nêgirewt û rayîrê demokrasîyî û xeta şaran akerdî. Xeta Kurdan ke Sûrîye de ameye sazkerdene, hetê pêroyê dinya ra ameyî fîrazkerdene û gîrîngîye dîye. Roja ma ya ewroyêne de ke dewleta Tirkî hema zî Kurdan înkar kena û wazena înan çin bike, hêrişê serê erdê Vakur û Rojakewtena Sûrîye kerd. Dewleta Tirkî destkewteyê Kurdan seba xo sey tehlûke vînena û seba naye zî her ca ra hêrişê Kurdan kena. Tirkîya şarê Vakur û Rojakewtena Sûrîye sey terorîstan vînena. Naye ra Rojawan îşxal kena. Kurdêk û şarê dinyayî nê hêrişan qebul nêkenê û do qebul nêkê. Hêrişê serê Rojawanî zulm û îşxalkarîye yê. Ma sey HDP qet na îşxalkarîye qebul nêkenê û verba hêrişanê Rojawanî vindenê. Pê nê hêrişan wazenê ke Kurdan çin bikê. Pêroyê dinya reng û vengê xoverdayîşê Kurdan eşnawit. Ganî ma nê firsendo tarîxî bixebitnê, Ganî Kongreya Neteweyî ya Kurdî bêra caardene. No meseleyê parîyêkî nîyo, no meseleyê neteweyî yo. Ganî ma se serranê peyênan ra ders bigêrê û seba ke ma hîna lez biresê armancê xo yewîya neteweyî şert o. Her wextî ra zêder hewceyê Kurdan bi yewîye esto. Ganî her Kurdêk, dezgehêk û partîyêke goreyê nê bîngeyî tê bigêrê."
