Nê menganê peyênan de Amed de kafeyî zî tede hêrişê panc cayan ame kerdene. Nê hêrişan de bi taybetî terzê ciwîyayîşî yê komelî û cinîyan ameyî hedefkerdene. Hêrişkerî îfadedayîşî ra dima vera dîyayî û înan ancî hêrişê di kafeyan kerd.

Wekîla DEM Partî ya Amedî Ceylane Akça Cupolo derheqê nê hêrişan de ANFyî rê qisey kerd. 

Ceylane pare kerd ke gama ke Suleyman Soyluyî qalê ci kerdêne Amed de mîyanê 45 rojan de vejîyaya werte. Ceylane vat: ''Goreyê ma nê kerdişî kerdişê xoserî nîyê. Jehro ke mutfaqa polîsan û îstîxbaratî de pewjîyeno bi şarê kurdî yeno werdene.''

Ceylane da zanayene ke nê hêrişî tesadufî nîyê û vat: ''Eşkera yo hîzbulkontrayî beşdarê koalîsyonê AKP-MHPyî bîyo. Derheqê hêrişkeran de mekanîzmaya muhakemekerdişî ya bitesîre nêameya caardene. Cemal Tutaro ke faîlê 109 cînayetan bîyo, pawitişê xo yê peyênî de wina vatbi 'Ez poşman nîya. Ma sey bombaya ke teqayîşî rê amade yê, ameyî zîndanî. Ma cînayetî bi ardimê Homayî kerd. Ma herême de heskerdişê leşker û polîsan qezenç kerd.' Gelo no îqtîdaro ke Tutar tehlîye kerdo û seba ke şoro teberê welatî mabênçîtîye kerda do tehqîqatêkê hîrayî bikero? Nê raştîyan mojnenê ke xopawitiş û wayîrvejîyayîşê waranê xo ra ber rayîrêko bîn çin o. Ganî ma welatê bêhuqûqî û bêasayîyî de wayîrê waranê xo yê cuye vejîyê û xo bipawê.''