Tîjda Ekecîk (Fatma Yagmur) çêranê têkoşînê azadîye yê Kurdîstanî ra yewe bîye. Aye xo Ewropa ra resna koyanê Kurdîstanî, bîye gerîlaya Zagrosan. Tîjda 13ê êlula 2016î de Cîlo de şehîd bîye.

Embazê aye yê têkoşînî Gelhat Dijwar qina qala ci kerde: ''Wisarê 2016î de Cîlo de ma yewbînî şinasnayî. O çax embazê neweyî cîlo de ameybî wezîfedarkerdene, komêke amebî war. Mîyanê na kome de embaze Tîjda zî estbî. Cîlo hetê awhewayî ra warêko ehmet o. O çax menga gulane bibî, vewre estbî. Embazî 6-7 saetan ra dima resayî cayê ma. Ma şîyî verê înan. Mîyanê înan de şehîde Hêlîne zî estbî. Embaze Tîjda warê ma de amebî wezîfedarkerdene. O çax dişmenî hêrişê Cîloyî kerd. Ma amadekarîya xo kerde. Embaze Tîjda zî hetê ma de bîye. Ma musayî ke a Almanya ra tewra têkoşînî bîye, uca de dadîya xo ra bîya  û pîl bîya. A reya verêne amebî Kurdîstan.

Karê ciwanan ra dima bi israrî ameye cepheyê şerî. Verî na taybetmendîya aye bala ma ante. Destpêk de Avaşîn de bîye dima zî derbazê Cîloyî bîye. Aye tim waştêne vernîya cepheyê şerî de ca bigêra, tim waştêne netîce bigêra.  Hetê metodan û fîzîkî ra tim xurt bîye. Aye bi israrî waşt ke çeka BKC bişuxilna. Ma tek çeka BKCyî daye ci, pê kêfê ci zaf ame. Pê çeka xo tim pozîsyonê şerî girewtêne.  A tim pê durustî û mesuldarî têgêrayêne. Manewîyatê ci berz bibi qerardarîya ci xurt bibî. Karanê zehmetan de rayberîye kerdêne, bêmabên xebitîyayêne.

Taybetmendîya ci ya bîne zî a zaf lez her çi musayêne. Aye Almanya de embazan reyde têkilîye ronaye û her roje zêdêr embazan ra hes kerd. Şehadetê embaze Sara zaf tesîrê aye kerdo. Verî ke tewre bibî embaze Sara reyde xoşebere kerdbi. Ney zî bira ci ya tewrbîyayîşî kerde xurtêr.

Şehadetê embaze Tîjda seba ma zehmet zî bo tewirê ci yê cuye, têkoşîn û coşê zerrîya ci mezg û zerrîya her kesî de cyê xo girewt. Şima Cîlo de kamyew embazî/e ra bipersê şima rê qala Tîjda keno/a. Aye vera dişmenî heta hela peyêne şer kerd.''