Cinîyanê TJA Deklarasyonê 25ê Teşrîna Peyêne ra dima ver bi Şaredarîya Sûrî rayraşîyayîş kerd û tîya de eşkerayîyêke daye. Halîde Turkoglu vat ke qeyûmî şîdetê camêrd-dewlete yê û ê seba erşawitişê qeyûman têkoşînî rê dewam bikerê.
Têgêrayîşê Cinîyan ê Azadan (TJA) çarçewa Roja Têkoşînê Vera Şîdetê Serê Cinîyan a 25ê Teşrîna Peyêne de bi şîarê ''Vera şîdetê camêrd-dewlete Jin, Jiyan, Azadî'' deklarasyonê xo eşkera kerd.
Aktîvîstanê TJA dima bi slogan û çepikan ver bi Şaredarîya Sûrî rayraşîyayîş kerd. Cinîyan pankarta ''Cînayetê cinîyan polîtîk û îdeolojîk ê'' akerde. Vervatoxa Meclîsê Cinîyan ê DEM Partî Halîde Turkoglu, Vervatoxa Meclîsê Cinîyan ê DBPyî Bêrîvane Bahçecî zî tewrê rayraşîyayîşî bîyî.
Halîde Turkoglu verê Şaredarîya Sûrî de eşkerayîye daye. Halîde Turkoglu vat ke qeyûmî şîdetê camêrd-dewlete yê û ê seba erşawitişê qeyûman têkoşînî rê dewam bikerê.
Halîde vat: ''Ma qeyûman qebul nêkenê. Qeymeqam û walîyî karmendê dewlete yê. La şaredarî hetê şarî ra ameyî weçînayene. Îradeyê şarê ma ame xespkerdene. Ma do seba cuya azade têkoşînî rê dewam bikerê. Ma do pêroyê qeyûman bişawê. Na saete ra pey çew nêeşkeno ma rê koletîye ferz bikero. Ma sey cinîyan koleyê çewî nîyê. Ma do seba cuya azade û rûmetêne xo ver bidê.''
Eşkerayîye bi sloganê "Jin jiyan azadî" qedîyaye.
