Ciwananê Welatperweran ê Kurdîstanî û Cinîyan ê Ciwanan ê Têkoşeran 30ê hezîrane de Qendîl de bi şîara ''Seba Kurdîstanêkê azad û xoserî faşîzm û îşxalan birijnê'' Hamleya Seferberîya Heftanînî îlan kerdbi. Eşkerayîya nînan ra dima Cinîyan ê Ciwanan ê Têkoşeran zî dabi zanayene ke înan seba ke leşkerê tirkî Başûrî ra bêrê vetene kampanyaya îmza daye destpêkerdene.

Ciwananê Binarê Qendîlî zî pê eşkerayîyêke tewirê xo vera îşxalê dewleta tirke mojna û ard ziwan ke ê amade yê ke tewrê Hamleya Seferberîya Heftanînî bibê.

Eşkerayîye hetê endamê Ciwanan ê Welatperweran Bihêz Feqeyî ra ameye wendene. Eşkerayîye de ame vatene ke ciwanî hêriş û îşxalê dewleta tirke şermezar kenê û nê hêrişan de cuya Qendilî bîye zehmet. Ciwanan ard ziwan ke dewleta tirke Qendîl û erdê Başûrî dana bombayan verî û nê hêrişanê xo de PKK yan zî sivîlan cîya nêkena hêrişê her kesî kena.