Vera hêrişanê îşxalî yê dewleta tirke yê serê Herêmanê Pawitişî yê Medya nêrazîbîyayîşî zêdîyenê. Ciwananê Kerkûkî yê Başûrê Kurdîstanî hêrişanê îşxalî ser o ANFyî rê qisey kerd.

Ciwanê bi nameyê Soran Serdarî ard ziwan ke armancê nê herişan îşxalê Başûrî yo û vat: ''Eke Tirkîya nê operasyonî de ser bikewa temamîya Başûrî do îşxal bikera. Tek hêzo ke Kurdîstan nê hêrişan ra paweno gerîla yê. Xoverdayîşê gerîlayan nika koyanê azadan ra verê îşxalê dewleta tirke vejîyeno.''

Ciwanê bînî yê bi nameyê Helgurd Ebdulkerîmî vat: ''Tirkîya seba îşxalê Başûrê Kurdîstanî PKK xo rê kerd mana. Tirkîya pê nê operasyonan wazena abigêra sînoranê xo yê Mîsak-i Mîllî. Coka gerîlayî xo ver danê. Ganî ma paştî bidê gerîlayan. Hêzê mîyanneteweyî û hêzê Başûrî vera nê hêrişan bêveng ê. Ma venga pêro terefanê kurdan danê ke wa paştî bidê gerîlayan û terefgîrîya partîyan war verdê.''