Konferansê 2. ê Ciwananê Rojakewtena Mîyanêne bajarê Kobanê yê Rojawanê Kurdistanî de virazîyena. Roja verêne ya Konferansî bi tewrbîyayîşê zaf kesanê zaf welatan qedîya.

Ciwanêkê Suryanij û endamê komîteya amadekar Aşûr Cercesî vat, “Ma ciwanê Suryanîyan seba ke ma wazenê çareserîyêko hempar seba krîzê Rojakewtena Mîyanêne bibo tewrê konferansî bîyê. Ma pîya ganî Rojakewtena Mîyanêne rê çareserîye bivînê.”

‘RIXMÊ HER ÇÎYÎ MA DO KONFERANSÊ XO BI SERKEWTIŞÎ TEMAM BIKERÊ

Cercesî dewamê ci de vat, “Ma ciwanê Suryanan ê Vakûrê Surîye, zereyê heme çalakî û bernameyan de ca girewt. Ma waşt ke, ma senî bi cîyarenginîya xo têhet de ciwîyenê bi nê konferansî bimojnê heme hevalanê xo yê ke teber ra ameyê. Bi nê konferansî di hedefê ma estê. Hedefê ma yo verên o yo ke ma ciwanê Rojakewtena Mîyanêne yewbînan nas û fehm bikerê. Tayê hevalê ma yê ke waştêne tewrê konferansî bibê, rayîr de astengîye ci rê ameye vetene.Vera nê astengîyan ma vanê; rixmê her çîyî ma do konferansê xo bi serkewtişî temam bikerê.”

ZAF BIMANA YO KONFERANS KOBANÊ DE YENO KERDENE’

Endamê Meclîsê Ciwanan Nasir Efrînî vat, “Konferansê Rojakewtena Mîyanêne yê 1'in 2015'î de Amed de amebi kerdene. Zaf muhîm û bimana yo ke konferaso 2’yin cayêko winasî de yeno kerdene. Kobanê bi îradê û hêzêko gird vera terorê DAÎŞ'yî xoverrodayîş da. Seba naye zî muhîm o ke Kobanê de yeno kerdene. Zaf welatanê cîyayan ra zaf endamê ciwanî tîya de ameyî têhet. Zaf hevalê ma yê ke Silêmanî ra, seba tewrbîyayîşê konferansî bibê kewtî bi rayîr ameyê astengkerdene û nêeşkayî tewrê konferansî bibê. Rixmê her çîyî zî Filîstîn, Lubnan, Beyrût, Îran, Tirkiya û çar parçeyanê Kurdistanî ra hevalî ameyî. Amancê sereke yê nê konferansî o yo ke yewîya Rojakewtena Mîyanêne awan biba.”

Zavir Diya Eldîn o  Çerkes  yo ke Minbic ra tewrê konferansî bîyo  vat ke  hîsêko zaf baş o ke merdim bi kencanê herême tewrê konferansî beno û vat: “Ma zanê ke konferans bi muneqaşanê muhîman ma ardê têhet. Ma ciwanê Tunisî, Lîbya, Misir û êb. reyêna ma wazanê vajê ke ma vera hêrişanê dewleta Tirkîya yê. Zaf rejîmê dîktatorî çi wext ke yewîya şaran bikerê hedefê xo, ma tîya de reyêna nîşan danê ke ma yew ê. Tayê dewletan ra hevalanê ke waştêne tewrê nê konferansî bibê, verê ci ame girewtene û seba ke nêrê tîya ci rê zaf maneyî vetî. Ez wazena veng bi hemeyê ciwananê Erebî bikera; dişmenê ma wazenê ma parçe bikerê. Ganî ma nêrê nê kayan û bibê yew.”