Torra Ziwan û Kulturî waşt ke vizêr qezaya Cizîre ya Şirnexî de seba ke kurdkî biba ziwano fermî û ziwanê perwerdeyî nawnayîşêk bikera. Nawnayîş pê bahaneya Korona ame astengkerdene.

Hemsereka DBPyî Salîha Aydenîz, Hemserekê Partîya Komunîste ya Kurdîstanî (KKP) Sînan Çîftyurek, Serekê Platformê Ziwanê Kurdkî Şerefxan Cizîrî, Wekîkê  HDPyî, hemserekê HDP û DBPyî yê Mêrdîn û Amedî zî tede xeylêk kesî verê bînaya HDPyî ya Cizîre de kom bîyî. Salîha Aydenîz hetê girseyî ra bi coşî ameye pêşwazîkerdene.

Dima cinî û camêrdan pê kincanê xo yê tradîsyonelan baxçeyê bîna de govende girewte. Destûr nêdîya ke Parka Birca Belekî de nawnayîş bêro kerdene. Naye ser o baxçeyê bînaya HDPyî de eşkerayîyêke dîyaye.

Baxçe de pankarta 'Wa ziwanê kurdkî biba ziwano fermî û ziwanê perwerdeyî' ameye akerdene. 

Şerefxan Cizîrîyî qiseykerdişê xo de ard ziwan ke armancê înan o esas o yo ke wa kurdkî bibo ziwano fermî Cizîrîyî vat: ''Ziwanê dayîke heqê ma yo, estbîyayîş û nasnameyê ma yo. Eke ê ziwanê ma qebul nêkenê estbîyayîşê ma zî qebul nêkenê.''

Hemserekê KKPyî Sînan Çîftyurekî vat: ''Ma paştî bidê ziwanê xo. Wayîrê nê nawnayîş û çalakîye vejîyê. Ez qedexekerdişê nê nawnayîşî şermezar kena.''

Hemsereka DBPyî Salîha Aydenîz vat: ''Ganî estbîyayîşê kurdan bêro şinasnayene. Heta ke kurdkî bêra şinasnayene têkoşînê ma do dewam bikero. Ma wazenê kurdkî biba ziwanê perwerdeyî û ziwano fermî. Heta no bêro caardene kampanyaya ma ya îmzayan zî do dewam bikera.''

Dima girseyî yew fekî ra sloganê 'Bê ziwan cuye nêbena' vat.