Dewleta tirke wextê peyênî de Colemêrg û qezayanê ci de qirkerdiş, îşkence, tepiştiş, destbendkerdiş û talankerdişê xoza zêdînayî. Şaristan de her roje serebûtêk qewimîyeno. Roniştoxê ke dewan de heywanan weye kenê, citkarîye kenê, serê sînorî de bazirganîye kenê dewlete nînan rê îşkence kena, kişena. 

Şaristan de polîtîkaya bêcezaverdayîşî zî dewam kena. 

Qezaya Geverî de taxa Orman, Esentepe û merkezê sûkî binê ablûqaya polîs û leşkeran de yê. Merkesê şaristanî û taxan de hêzê dewlete bi hawayêkê keyfî kontrolê nasnameyî (GBT) kenê. 15ê tebaxe de sereştişê keyeyan de Mayê Haştîye zî tede 30 kesî ameybî destbendkerdene.

15ê tebaxe de  dewa Gelêşimî ya qezaya Şemzînanî de netîceya hêrişê leşkeranê tirkan de 2 kolberî birîndar bîyî. Dima nê birîndarî zî tede 3 kesî ameyî destbendkerdene. Aqîbetê wird kolberan nêzanîyeno.

Marînûs de şewato ke 10ê tebaxe de dest pêkerdo, vila beno. Şewat de bi hezaran darî vêşayî û xoza talan bîye.

Awa çemî ya deweka Îsyanî ya dewa Bêruhî ya Rûbarokî ameye birnayene. Dewijî nêeşkenê awe bidê heywananê xo û baxçeyanê xo. 

Herêma Navberojan a qezaya Rûbarokî de 25ê temmuze de Serhat, Mahmût Serkan Taş û Ercan Ozmenî S. Taşî reyde heywanê xo çêrnayêne. Leşkeran îşkenceyê nînan kerd û dima ê destbend kerdî. Ciwanî nezaret de bi rojan raştê îşkenceyî ameyî.

6ê temmuze de dadîya 65 serre ameye destbendkerdene. Merkezê qezaya Geverî û dewanê Bilindhasan û Birdikî de leşkeran eşt keyeyan ser û 5 kesî destbend kerdî.