Avûkat Fuat Coşacako ke 2001-2015 de avûkatîya Rayberê Şarê Kurdî Abdullah Ocalanî zî kerde tecrîdê Îmraliyî ser o ANFyî rê qisey kerd.

Coşacakî îfade kerd ke Îmrali de îşkenceyê sîstematîkî estê û vat: ''Heqê tepişteyanê Îmraliyî yenê binpaykerdene. Ganî pêro dezgehê demokratîkî vera ney vinderê. Îmrali de pêvînayîşê keye û avûkatan, mektubî, faks û telefon qedexe yê. Huqûq de pênaseyê nê kerdişan kerdişê xirabî yê, îşkence yê. Tecrîdî ra zêdêr Îmrali de tecrîdêko mutlaq esto. Netîceyê nê kerdişan zî do giran bibê.''

Coşacakî raporê 2020î yê CPTyî vist vîrî û vat: ''CPTyî pênase kerdo ke Îmrali de pêro heqê tepişteyan ameyî binpaykerdene. CPTyî vat 'Ê pêro tepişteyî binê tecrîdêkê mutlaqî de yê. Dewleye vana 'ma uca de asayîşê xo yê meşrûyî anê ca.' La na bêhuqûqî ya. CPTyî vat ke wa pêvînayîşî bêrê kerdene. Meclîsê Parlamenteran ê Yewîya Ewropa (YE) zî no rapor îmza kerd. 2004 de Mehkemeya Heqanê Merdiman a Ewropa vatbi 'cezaya muebede binpaykerdişê heqê merdiman o.' Her çiqas Tirkîya bi bahaneya asayîşî tecrîd ana ca zî no kerdişê ci raşt nîyo.CPT û Tirkîya pabesteyê Konseya Ewropa yê û Tirkîya neçar a ke waştişanê CPTyî bîyara ca. ''

Coşacakî bale ante grevê vêşanîye yê tepişteyan ser û vat: '' Tepişteyî pê îradeyê xo na çalakîye anê û dewlete ra tay waştişê înan estê.Ganî hukmat û meqamî seba tepişteyan gamêke bierzê.''

Coşacakî ard ziwan ke prosesê çareserîye de komel de hêvîyêke virazîyabî û ganî reyna prosesêkê çareserîye bêro awankerdene. Coşacakî vat: ''Îqtîdarî nika na meseleya kurdan kerde bara HDPyî. HDP bi sereyê xo na mesele safî nêkena. HDP venga PKKyî zî bido reyna çîyêk do nêvurîyo. HDP hêzêkê PKKyî nîyo ke ci rê hukm bikero. Seke Birêz Ocalanî vat dewlete ganî na mesele çareser bikera.''