Dewleta tirke serranê 90an de Kurdîstan de dewî vêşnayî û merdimî surgun kerdî. Netîceya na polîtîkaya de xeylêk keyeyan erd, mal û mulkê xo terikna û koçê metropolanê Tirkîya kerd. Tayê înan wexto ke agêrayî hînî çîyê înan çin bi, tayê bînî hema zî nêeşkenê abigêrê.

Keyeyê Gultekînî dewa Markî ya qezaya Licê ya Amedî de mendêne. Leşkeran eşt keyeyê înan ser, hacetê înan vêşnayî û keye surgun kerd. Keyeyê Gultekînî surgunê Adana bi. Dima ke keye agêra dewa xo hînî kokim bi. 

Dayîke Hasrete Gultekîne ard ziwan ke cuya înan bi xizanîye û zehmetîyan derbaz bîye û vat: ''Ma bexçe ramitêne la qezencê ma kêm bi. Leşkeran eşt keyeyê ma ser. Ez û mêrdeyê ma bi zorî vetî teber û keyeyê ma vêşna, hacetê ma vêşnayî. Leşkeran ma verê camî de kom kerdî. Merdimê ma nêzdîyê dewe bîyî, înan ma berdî cayê xo.  Uca ra ma koçê Adana kerd. Adana de ma xizanîye dîye. Ma dî ke nêeşkenê debara xo bikerê, ma agêrayî û dewe de xo rê banêk viraşt. Erdlerzî ra dima banê ma zerar dî la çewî kontrol nêkerd. Ma teyna Homayî ra pawenê. Ma hema newe ameyî dewe. Hînî ma do vêşan bimanê, bimirê ma nêzanenê.''

Mêrdeyê Hasrete Mehmet Gultekînî zî îfade kerd ke bi desan serrî yo înan zîret kerdêne, debara xo bi zîretî kerdêne û vat: ''O çax seba ke traktor yan zî wesayîtê bi motorî çin bîyî, ma her çi bi destan kerdêne. Coka ma zafêr axpînan de xebitîyayêne û ma hetkarîya merdiman kerdêne. Ma bi tonan firîngî arê dayêne û bi kamyonan berdêne rotêne. Nika çîkê ma çin o. Ciwanîya ma de exlaqê merdiman holêr bi. Nika her kes teyna xo fikirîyeno.''