Komîteya Têkilîyanê Teberî ya KCKyî derheqê qirkerdişê Mehmet Zekî Çelebîyî de eşkerayîyêke daye.

KCKyî îfade kerd ke Başûr de bi hemkarîya dewleta tirke û PDKyî koçberê sîyasîyî yenê qirkerdene û vat: ''Temamê dinya zî vengê xo vera nê qirkerdişan nêkena. Komîserîya Koçberan a Neteweyanê Yewbîyayeyan (NY) û hukmatê Başûrê Kurdîstanî seba ke heta nika vera nê cînayetan tewirêko cidî nêmojna nînan ra mesuldar ê.

Ganî hêzê sîyasî yê Kurdîstanî vera nê kiştişan asta tewr berze de tewirê xo bimojnê. Ganî vera nê cînayetan tewirê înan bibo zelal. Nêbo her kes do neçare bimano ke pawitişê xo bikero û heqê xo yê meşrûyî bişuxilno. Eke serebûtê winasênî biqewimê ma tira mesuldar nîyê.

Bi nê qirkerdiş û cînayetanê polîtîkan wazenê şarê kurdî, şorişgêr û welatperweran bitersnê û bikerê ke ma apey game bierzê. Dewleta tirke bi hemkarîya PDKyî , bi telefonî, bi têrî qiseykerdişî, bi gefan, bi şantaj û tersnayîşî û ajankerdişî xîret kena ke Têgêrayîşê Azadîye û gerîlayan biqedîna. Dewleta tirke kurdan sey dişmen vînena û lişena. Şexsê Mehmet Zekî Çelebîyî de no reyna eşkera bi. Ganî bêro zanayene ke nê hêrişî do pê kurdan nêeşkê. Eqsê ci do hêrsê kurdan bizêdînê û cepheyê kurdan ê azadan pîlêr bikerê. Têkoşînê Azadîye yê Kurdan bi bedelanê giranan û şehîdan do bin nêkewo.

Ganî îdareyê Silêmanî û mesuldarê polîtîkî bi erkê xo têbigêrê. Bi nê hêrişan yeno kerdene ke Silêmanî bikerê merkezê cînayetanê polîtîkan. Kurdî pîya vera hemkarîya PDKyî tewirê xo mojnenê û PDKyî têna verdenê. Ê wazenê Silêmanî bêaramî bikerê. Îdareyê Silêmanî û mesuldarê polîtîkî ganî bi erkê xo têbigêrê û vera na rewşe hişyar bibê û tewirêkê zelalî bimojnê. Ganî planê peyê nê cînayetan bêrê eşkerakerdene. Hêvîya şarê kurdî û keyeyanê nê merdimanê ke ameyî qetilkerdene na ya.

Hewlêr bîyo versî û estaretê qirkerdişanê kurdan. Kiştoxê ke Silêmanî de suîkastanê sîyasîyan kenê remenê Hewlêrî. Hewlêr hînî bîyo merkezê pawitişê kiştoxan. PDKyî nêçîrwanîya kurdan ra fek vera nêdaya. PDK hemkarîya dewleta tirke keno, dormeyê waranê gerîlayan gêno, dafikan nano ro, îstîxbarat dano dewleta tirke û hêrişan keno.

Şarê ma bêguman vera PDKyî tewirêkê eşkerayî bimojno. Ma vnega Xaça Sûre, Komîserîya Koçberan a NYyî û rêxistinanê heqanê merdiman ê mîyannetewetîyan danê ke vera nê cînayetanê polîtîkan ê bi hemkarîya MÎT-Parastinî tewirê xo bimojnê. Heqê şarê kurdî û kurdan ê azadan o ke vera nê hêrişan bi her hawayî pawitişê xo yê cewherîy bikerê. Kiştoxan ra qetî hesab do bêro persayene.''