Mehkemeya Berze ya Federale ya Iraqî derheqê Herêma Kurdîstanî de birê serê weçînayîşî û ekonomî de dayî. Wekîlê verênî yê Komeleya Dadgerî Ehmed Hecî Reşîdî ANFyî rê derheqê babete de qisey kerd.

Reşîdî dîyar kerd ke goreyê biranê mehkeme weçînayîşî do goreyê biranê PDKyî ney nêbo. Reşîdî vat: ''Eke nê birê mehkeme bêrê caardene Başûrê Kurdîstanî de herinda îqtîdarê yew partîye de mabênê partîyan de yew hemsengîye do bivirazîya û çîyê demokratîkî do biqewimîyê. Bernameyê weçînayîşan o ke hetê PDKyî ra amebi viraştene antî-demokratîk o. Ewro netîceya polîtîkayanê PDKyî de hinî rewşe winayên a ke meaşê karmendan nêdîyenê. Bi biranê neweyan hinî meaşî do hetê Iraqî ra bêrê dayene û bi nê hawayî verê kadroyanê terefgîranê PDKyî zî do bêro girewtene. Sîstemê PDKyî de bêusûlîyî zaf ê. Mîsal Wezîrîya Pêşmergeyan ra 433 hezar kesî meaş gênê. Nufusê Başûrî cara şeş mîlyon o senî 433 hezar kesî hende meaş gênê?''

Reşîdî bale ante ser ke rotişê petrolî zî hînî hetê Bexdadî ra do bêra kerdene û vat: ''PDKyî 2003 de dewleta tirke de peymana rotişê petrolî ya 50 serran viraştbî. Mehkemeya Iraqî verê cû zî na peymane neheq kerdbî la PDKyî ancî zî peymane betal nêkerde. Na peymane de dewleta Îsraîlî zî est a. La goreyê qanûnanê Iraqî bazirganîya bi Îsraîlî qedexe ya.''

Reşîdî bale ante ser ke Başûr de mabênê sinifan de cîyatîyê pîlî est ê; şar xizan la îqtîdar zaf zengîn o. Reşîdî îfade kerd ke rîyê deynanê îqtîdarê Başûrî ra erdê Başûrî yeno îşxalkerdene. Reşîdî vat: ''Xora biranê mehkemeya federale de çîyê negatîfî zî est ê. Goreyê nê biran sîstemê Başûrî sey verî do nêbo û do Başûr sey verî destkewteyanê xo ra îstîfade nêkero. Rîyê bêusûlîyanê PDKyî ra şarê Başûrî ho bedel dano. Ganî naye ra pey şarê Başûrî wayîrê destkewteyanê xo vejîyo.''