Têgêrayîşê Cinîyan ê Azadan (TJA) çarçewa Roja Dadîyan de taxa Yenîşehîrî ya qezaya Nisêbînî ya Mêrdînî de çalakîyêke kerde. Hemsereka DBPyî Salîha Aydenîz, Wekîlê HDPyî Peroye Dundar, Nurane Îmîr, Ayşe Surucu, Endamê Meclîsê Mayanê Haştîye, merdimê tepişteyanê nêweşan û  Amed, Mêrdîn, Êlih , Sêrt û Şirnexî ra xeylêk dadîyê bînî tewrê çalakîye bîyî. Çalakîye de pankarta bi nuşteyê 'Heta ma rojanê azadan awan nêkerê, ma do têkoşînî rê dewam bikerê', 'Dadîyê têkoşerî rûmetê ma yê' akerdî.

Dadîyî bi slogananê “Bijî berxwedana Zapê”, “Bijî Serok Apo”, “Jin jiyan azadî” û “Bijî berxwedana dayikan” warê aktîvîte de ameyî têhet. Çalakîye bi deqayêkê rêzgirewtişî û merşê Çerxa Şoreşê dest pêkerd. Îdarekara MEBYA-DERî Meryeme Soylu çalakîye de qisey kerd û vat: ''Ewro dadîyî pabeyê ci yê ke domananê xo de na roje fîraz bikerê. Domanê ma verarê ma de ciwîyenê. Dadîyî nê prosesî de nêeşkenê şorê serê goranê domananê xo. PDK zî ewro koyanê ma dano bombayan ver û domananê ma qetil keno.''

Qiseykerdişê Soyluye ra dima derheqê Mayanê Haştîye û Mayanê Laçiksipîyan de sînevîzyonêk ame mojnayene. Dima nameyê Meclîsê Mayanê Haştîye ser o Esmere Çikmaz qisey kerd û bale ante girîngîya Roja Dadîyan ser. Çakmaze îfade kerd ke ê nêwazenê gonîye birijîya û vat: ''No dej heta key dewam bikero? Ganî dadîyî biherîkê serê sînorî. Lanet bêro PDKyî. Ma do nê kerdişan xo vîr a mekerê.''

Cinîyan ra Nazîfe ya ke 6 mengî yo Nobeta Edaletî de ya vat: ''Waştişê ma oyo ke wa na gonî vindero. Wa tepişteyê nêweşî bêrê veradayene. Waştiş ma haştîye û azadîye yê.''

Dadîyî bi slogananê “Bijî berxwedana Zapê” û “Bimre ixanet” rayra şîyî  û dima ra eşkerayîyêke ameye dayene.  Mayanê Haştîye ra Besna Gunaye Roja Dadîyan bimbarek kerd û  vera hêrişê AKP-PDKyî yê vera Başûrê Kurdîstanî hersê xo ard ziwan. Gunaye veng da keyeyê Barzanî û vat: ''Nê şerê leyminî biqedinê. Şima pê qikerdişî û tepiştişî nêeşkenê nê şarî biqedinê. Barzanî hem nê şerî rayra beno hem zî nê şermîyeno vano o kurd o. Eyb o, gune yo.''

Ganaye vist vîrî ke cenazayê 5 gerîlayanê HPGyî yê Xelîfanî nêameyî dayene û vat: ''Şar kuçeyan de cenazayanê xo wazeno. Bişerm, bişerm cenazayanê nê dadîyan bidê. Dadîyî roşan û Roja Dadîyan de cenazayanê xo wazenê. Ti nêşermîyenê dişmenîya kurdan kenê? Wa na gonî bêro vintertene, mergî mebê, zîndanan ra cenazayî mevejîyê. Ma nêwazeno wa çew bimiro. Wa no şer biqedîyo.''