Seba azadîya Rayberê Şarê Kurdî Abdullah Ocalanî û çareserîya meseleya kurdan tepişteyê dewaya PKK û PAJKî 25 rojî yo grevê vêşanîye kenê. Dadî û keyeyê tepişteyan zî xeylêk şaristanan de seba paştdayîşê grevê vêşanîye Nobeta Edaletî kenê.

Dadîyê ke tewrê Nobeta Edaletî ya Amedî bîyê, înan ANFyî rê qisey kerd.

Dadîya tepişte Muhammed Kartalî Afîfe Kartal vat: ''Heta ke domanê ma grevê vêşanîye bikerê ma zî tîya de nobete bigêrê. Ma wazenê ke wa vengê domananê ma bêro eşnawitene. Tecrîd sûcê vera merdimatîye yo. Heta ke Rayber Apo bêro tecrîdkerdene ma do xo ver bidê. Ez venga pêro dadîyan dana ke wa paştî bidê tepişteyan û vera tecrîdî vengê xo vejê.''

Dadîya tepişte Gulîstane Dag Emîne Dag vat: ''Domanê ma wazenê ke wa peynîya tecrîdî bêra. Ma zî ney wazenê. Wa domanê ma şertanê goreyê merdimatîye de biciwîyê. Ez dadîyanê şehîdan, tepişteyan û gerîlayan selam kena. Wa ma bibê vengê zîndanan, ma domananê xo teyna meverdê.''

Dadîye Muşeher Guler vat: ''Çend mengî yo Rayber Apoyî ra xeberêke nêna girewtene. Na rewşe de ma nêeşkenê keyeyanê o de ronişê. Ê nêeşkenê şarê ma biqedînê. Ê hêrişê cenazayanê ma kenê, qirkerdişan kenê, ciwananê ma kişenê. Ma vera nê kerdişan tîya de yê. Şarê kurdî do apey gamêke zî nêerzo. Ma bi Rayber Apoyî û domananê xo bawer ê. Ez bi xo tepişîyabî, mi îşkence zî dî. La ma qetî sereyê xo nêard war. Ma do bi xoverdayîşî ser bikewê.''

Dadîye Halîme Topuz vat: ''Ma azadîye û haştîye wazenê. Ma şerî nêwazenê. Waştişê domananê ma waştişê ma yê zî. Rayber Apo rayberê şarê ma yo. Wa tecrîd bêro wedaritene û pêvînayîşê bi Rayber Apoyî ancî dest pêbikerê. Wa goş bêro dayene waştişanê domananê ma ser. Ma wazenê wa vengê tepişteyan bêro eşnawitene.''