Partîya Demokratîke ya Şaran (HDP) Darbeya 4ê Teşrîna Perêne ya ke  2016 de ame kerdene protesto kerd.Rêxitina HDPyî ya Amedî Parka Hazale ya qezaya Yenîşehîr de eşkerayîye daye. Wekîla HDPyî ya Amedî Remzîye Tosun, îdarekarê merkez û qezayan ê bajarî, temsîlkarê rêxitinanê komelê sîvîlî û xeylêk kesî tewrê ci bîyî.

Eşkerayîye de Hemserekê HDPyî yê Amedî Zeyyat Ceylanî nê vatî: ''Amaê darbeyî rehîngiretişê sîyasetê demokratîkî bi. Bi operasyonanê bêhuqûqan yeno waştene ke sîyaseto demokratîk bêro qedînayene û verê waştişê azadîye û haştîye bêro girewtene.Tim û tim vera partîya ma bi bahanayanê cîya cîyayan operasyonî yenê kerdene. Bi hezayan îdareker û endamê partîya ma ameyî destbendkerdene, tepiştene û surgunkerdene. Nê prosesî ke 4ê teşrîna peyêne de dest pêkerd eynî wextî de bi zemînê Darbeya Qeyûmî ya 19ê tebaxe û Dewaya Kobanê û dewaya ke vera partîya ma ameye akerdene. Dejê vînîkerdişê vîjnayîşê 7ê hezîrane wazenê HDPyî  û şaran ra vejê. Êyê ke pê sîyasetî nêeşkenê HDPyî pê zulm û zextî yenê ma ser ke ma rê çok bidê dayene. La ê se kenê wa bikerê ma do rayîrê xo yê heqedarî de qerardar aver şirê. Gama ke banê partîye û mîtîngê ma dîyayî bombayan ver, hemşaredarê ma ameyî tepiştene û şaredarîyê ma ameyî xespkerdene ma vat 'HDP nê do faşîzm çok bido'.  Îqtîdarî pê polîtîkaya hêrişkare peynîya xo arde la partîya ma ya ke şaran temsîl kena sareberz payra ya. Îqtîdaro ke pê şerî wazeno emrê xo derg bikero ma do vera ci îtîfaqê demokratîkî înşa bikerê û têkoşînî pîlêr bikerê.''

Reyna Riha, Mêrdîn, Şirnex, Semsûr, Êlih, Colemêrg, Îdir,Sêrt,Adana, Mersin, Antalya û xeylêk bajaranê bînan ê Kurdîstan û Tirkîya de bi çalakîyan hêrişê vera HDPyî ameyî şermezarkerdene û mesajê wayîrvejîyayîşê HDPyî û xurtkerdişê têkoşînî dîyayî.