Rêxistina HDPyî ya Dêrsimî bi wesîleya serrgêra Darbeya  4ê Teşrîna Peyêne waşt ke Kuçeyê Sanatî de eşkerayîye bide la verê eşkerayîye polîsan banê HDPyî girewt binê ablûqa û destûrê eşkerayîye nêda.

Grûba ke semedê eşkerayîye vejîyayî teber hetê polîsan ra verê ci ame girewtene û destûr nêdîya ke eşkerîye bide. Kuçeyê Sanatî de xeylêk kesê ke ameyî têhet vera naye nêrazîbîyayîş ramojna. Mabanê Parlamenterê HDPyî yê Dêrsimî Alîcan Onlu û polîsan de munaqeşe ame kerdene. HDPyîjan ke waşt ver bi cayê eşkerayîye şirê raştê hêrişê polîsan ameyî. Hemserekê HDPyî yê Bajarî û îdarekarê ÎHDyî pê derbkerdişî ame waştene ke bêrê destbendkerdene. Vera hêrişê polîsan şar pê slogana 'ma vera zextan çok nêdanê' qîra.

Onluyî vera astenkerdişê eşkerayîye hersê xo ard ziwan û vat no talîmatê Qesre yo. Onluyî vat: ''Têna Birêz Ocalan ney heme welat binê tecrîdî de yo. Têna Kurdîstan de îradeyê şarê kurdî ney senî ke ma Unîvesîteya Bogazîçî dîye heme warî ameyî xespkerdene .Na dewlete helisîyaya. Ewro tîya walî serekê AKPyî yê bajarî yo. Keso ke pîya bi serekê AKPyî yê bajarî teftîşan keno senî eşkeno bibo valîyê bajarêkî.'' Badê muneqeşeyan grûbe agêrayî banê HDPyî û tîya eşkerayîye daye.

Çewlîg de zî bi eynî waştişî rêxitina HDPyî Kuçeyê Gençî de verê Kuleyê Saetî de eşkerayîye daye. Xeylêk kesî tewrê eşkerayîye bîyî. Eşkerayîye de bale ameye antene zextenê vera HDPyî ser û ame vatene ke rixmê heme hêrişan ê qerardar têkoşînê xo rê dewam kenê û çirey do verê darbeyan de milê xo çewt nêkerê. Badê eşkerayîye HDPyîjan PTTyî ra Hemserekanê verênan ê HDPyî Fîgene Yuksekdag û Selahattin Demîrtaşî rê kartê paştdayîşî şawitî.