Emîne Şenyaşara ke di lajê ci û mêrdeyê ci hetê merdim û pawitoxanê Wekîlê AKPyî Halîl Îbrahîm Yildizî ra kişîyayî lajê xo yê bînî Ferît Şenyaşarî reyde verê Edlîyeya Riha de 35 rojî yo nobeta edaletî kena. 

 Dayîke Emîne ard ziwan ke wa sûcdarî bêrê muhakemekerdene û vat: ''Keyeyê mi ra 3 kesî kişîyayî, yewê ci zî zîndan de yo. Kiştoxê domananê mi bi rehetî gêrenê. Ez do tîya ra nêwurza, wa mi bikişê. Înan nêweşxane de domanê mi kiştî. Wa qeydê nêweşxane bêrê eşkerakerdene. Wijdanê înan çin o? Na senî dewlet a? '' 

Ferît Şenyaşarî zî da zanayene ke verî dozgerê dosya ci rê vato ke 23 şikdarî ameyî tesbîtkerdene. Ferît Şenyaşarî vat: ''Key nê kesî tepişîyayî ma do tîya ra wurzê. Heta ke nê merdimê ke sûcê merdimîye kerd, nêtepişîyayî ez û dadîya mi ma tîya de ronişê. Têkoşînê ma têkoşînê her kesî yo. Wa her kes wayîrê nê têkoşînî vejîyo.''