Konferansê Îstîsnayî yê 6. ra verî Partîya Herêmanê Demokratîkan (DBP) qezaya Rêzanî ya Amedî de salonêka dawetî de bi sloganê şîarê 'Ma bi komelê rêxistinbîyayeyî cuya azade awan bikerê' konferansê xo yo pîl kerd.

Konferans de belgeya tewirî ameye eşkerakerdene. Vervatoxa Meclîsê Cinîyan ê DBPyî Aynure Sarica belge wende.

Belgeya tewirî ya DBPyî wina ya:

''Ma nê prosesê krîtîkî de bi nê konferansî têkoşînê xo ercna. Konferansê ma bi tesdîqkerdişê qerardarîya têkoşînê ma.

Modernîteya kapîtalîste bi krîzan û şeran serdestîya xo pêro dinya rê ferz kena. Hêzê kapîtalîstî hema zî gêrenê şer û qirkerdişanê neweyan. Şarî hedefê qirkerdiş, kolonyalîzmî yê modernîteya kapîtalîste de yê. Ganî vera nê sîstemî, qirkerdişê cinîyan û xoza têkoşînê şaran bêro yewkerdene. Vera sîstemê neteweya dewlete zî çareserîye sîstemê neteweya demokratîke-konfederalîzmê demokratîkî de ya. Konferansê ma de ame parekerdene ke vera modernîteya kapîtalîste û sîstemê netewe-dewlete têkoşîn bêro berzkerdene û pêro şarî tewrê nê têkoşînî bêrê kerdene.

Meseleyê sey Filîstîn û Kurdîstanî bi rijnayîşê hişmendîya netewe-dewlete û caardişê paradîgmaya ekolojîke, demokratîke û azadîgîrîya cinîyan a Abdullah Ocalanî mumkîn a. Konferansê ma venga pêro şaranê Rojhelatê Mîyanênî da ke vera na hişmendîya netewe-dewlete têkoşînî berz bikerê. Konferansê ma venga pêro hêzanê demokrasî da ke tewrê nê têkoşînê şaran bibê.

Meseleya Kurdîstanî meseleya statuyê kurdan a. Na mesele bingeyê pêro meseleyan o û çareserîya ci zî çareserîya pêro meseleyan a. Konferansê ma bire daye ke heta ke kurdî bibê wayîrê statuyêkî ma têkoşîn bikerê û nê esasî ser o şîarê 'Bi komelê rêxistinbîyayeyî, komelê azadî ma awan bikerê' hedefê xo yê têkoşînî rê weçîna.

Birêz Abdullah Ocalan hem îrade û temsîlkarê kurdan o hem zî lîderêko tarîxî û îdeolojîk o. Meseleya kurdan de seba çareserîye zî tek muxatab Birêz Ocalan o. Her ke tecrîdê vera Birêz Ocalanî yeno girankerdene şer û krîzî zî benê giranêr. Seba ke meseleya kurdan çareser biba û krîz û şerî biqedê ganî her kes vera tecrîdî vengê xo berz bikero. Konferansê ma de ame dîyarkerdene ke tecrîd qetî do nêro qebulkerdene û heta ke Birêz Ocalan azad bibo têkoşîn û xoverdayîş do bêrê berzkerdene.

Konferansê ma de bire dîyaye ke sey erkê verênî yewîya kurdan bêra caardene. Konferansê ma de bire dîyaye ke vera qirkerdişê kulturelî, xoza û komelî xorêxistinîye bêra xurtkerdene; vera torranê tîryakî û fuhuşî zî her taxe de rêxistinîye bêra caardene.

Konferansê ma de bire dîyaye ke vera sîstemê qeyûman ê koletîye û kolonyalîzmî destkewteyê sey xoîdarkerdişî û heqê weçînayîş û weçînîyayîşî bêrê pawitene. Konferansê ma de bire dîyaye ke vera hêrişanê îdeolojîkan têkoşîno îdeolojîk û şorişê hişmendîye do bêrê kerdene. Konferansê ma de bire dîyaye ke partîya ma bi xurtî her ca de xo rêxistin bikera. Konferansê venga pêro endamanê ma da ke wa prosesê verê ma de tewrê seferberîya xorêxistinkerdişî bibê.

Konferansê ma de bire dîyaye ke seba rijnayîşê faşîzî têkoşîno demokratîk sey erkî bêro caerdene. Konferansê ma de bire dîyaye ke partîya ma bi perspektîfê cinîya azade û bi şîarê 'Jin, Jiyan, Azadî' her ca de raştîya cinîyan eşkera bikera, sîstemê hemserekîye xurtêr bikera û xopawitiş û xorêxistinîya cinîyan aver bera. Konferansê ma de bire dîyaye ke sere de ê cinîyî ciwanî serkêşîya prosesî bikerê.

Ma bi moral, coş û xîretê nê konferansî ver bi Kongreya Îstîsnayî ya 6. şinê. Ma venga pêro şarê xo danê ke seba pîlkerdişê têkoşîn û xoverdayîşî wa tewrê kongreya ma bibo.''