Vera kişîyayîşê karkerê kurdî Ozkan Tokayî nêrazîbîyayîşî dewam kenê. Endamê Heyetê Rayberdişê Merkezî yê HDPyî û Hetkarê Hemserekan Umît Dedeyî pare kerd ke nê hêrişî nêzdîbîyayîşê hukmatî yê vera kurdan ra qewimîyenê.
Endamê Heyetê Rayberdişê Merkezî yê HDPyî û Hetkarê Hemserekan Umît Dede û Hemserekê HDPyî yê Erdîşî xeyma serweşîye ya Tokayî zîyaret kerde.
Wird sîyasetmedaran zî vera kişîyayîşê Tokayî nêrazîbîyayîşê xo mojna û îfade kerd ke nê hêrişê bêmabênî yê vera kurdan nêzdîbîyayîşê hukmatî ra qewimîyenê.
Umît Dedeyî vat: ''Vera kurdan kampanyaya lînçî yena caardene. Komeê nîjadperestî yê ke naye ra hêz gênê wayîrê nîjadperestîye vejîyenê. Îqtîdarî bi ziwanê xo yê sîyasîyî vera kurdan komel de 'bêtehamulîye' afernaye. Nê hêrişî netîceya nêzdîbîyayîş û polîtîkaya dişmenîya vera kurdan ê îqtîdarî ya. Mumkîn nîyo ke ma nê nêzdîbîyayîşî qebul bikerê. Ma do vera nê hêrişan wurzê payan ser.''
Hemserekê HDPyî yê Erdîşî Yaşar Kucaşî vist vîrî ke dima ke cenazaya Tokayî ameye Erdîş leşker û polîsan dormeyê goristanî girewt.
Kucaşî vat: ''Sena ke îmkanê înan çin ê ciwanê ma şinê Îstanbul, Anqara û şaristananê bînan de xebitîyenê. La ciwanê ma hetê nîjadperestan ra kişîyenê. Nê hêrişî nênê qebulkerdene. Ma nê hêrişan şermezar kenê. Nê hêrişî benê sebeb ke komel de hêrsêk vejîyo werte.Ganî hînî haştîye bêra û na nîjadperestî biqeda. Kurdî hînî nêeşkenê ke rojawanê Tirkîya de bi ziwanê xo qisey bikerê. Ganî bêhuqûqî û bêedaletî cade biqedê.''
