Wezîrê  Karanê Zereyî Suleyman Soyluyî bernameyêkê televîzyonî de îdîa kerd ke Tirkîya de îşkence çin o, wextê wezîfeyê ci de qet yew kes maruzê îşkenceyî nêmendo.

Huqûqî ra Berpirsîyar Hetkarê Hemserekan ê Pêroyîyan ê HDPyî  Umît Dedeyî derheqê îdîaya Soyluyî de ANFyî rê qisey kerd.

Dedeyî ard ziwan ke Soyluyî herinda ke cewab bido îdîayanê serê ey qala hîkayeya cuya xo kerde û vat: ''Soyluyî îdîa kerd ke wextê wextê ey de îşkence nêameyo kerdene, merdimî nêkişîyayê, kes nêameyo remnayene. Goreyê na îdîa Rêxistina Efû ya Mîyanneteweyî derheqê Tirkîya de qet yew rapor amade nêkerdo. Labelê Rêxistina Efû keyepelê xo de raporê serê Tirkîya weşanayî û pare kerd ke îdîayê Soyluyî zûr ê. Raporî mojnenê ke Tirkîya de îşkence esto û merdimî yenê remnayene.

Dezgehê heqanê merdiman ê Tirkîya serebûtanê îşkenceyî tesbît kenê û pare kenê. Wextê Wezîrîya Soyluyî de xeylê îdîayê îşkenceyî estê. Serebûtê helîkopterî yê Wanî hema zî vîran de yo. Netîceya nê îşkenceyî de merdimêk merd. Baroyê Riha îfade kerd ke Xalfetî de destbendkerdeyan rê îşkence ameyo kerdene. Îdîayê Soyluyî hetê rêxistinanê heqanê merdiman ra ameyî pûçkerdene. 10 serranê peyênan de endamê Merkezê Ciwanan ê partîya ma ameyî remnayene û înan rê gef ame werdene. Tehqîqatê nê serebûtan dewam kenê.''

Dedeyî da zanayene ke serran 2000an de zî wextê Soyluyî de cînayetê faîl-î meçhûlî û îşkeneceyan dewam kerd. Dedeyî vat: ''Verê kamerayan de Tahîr Elçî kişîya la kiştox hema zî nêame dîyene. Newroze de Kemal Kurkut verê kamerayan de ame qetilkerdene. Serranê 90an de torosê sipîyî estbîy, serranê 2000an de transporterê sîyayî estê. Ma şahîdê nê serebûtan ê. Ganî dewlete mesuldarîya xo bivîna û hesabê ci bida.''