Bi nêzdîbîyayîşê weçînayîşanê herêmîyan xebatî zî dîyayî destpêkerdene. Îqtîdarê AKP-MHPyî sîstemê qeyûman vurnayo polîtîkayêka dewlete û dest na îradeyê şarî ser. Hemşaredarê Êlihî Mehmet Demîro ke herinda ci de qeyûm amebi tayînkerdene derheqê babete de ANFyî rê qisey kerd.

Mehmet Demîrî îfade kerd ke sîstemê qeyûman vera paradîgma, nasname, kulturê kurdan yeno caardene û vat: ''Rejîmê qeyûman sîstemêko winayên o îqtîdarê AKP-MHPyî wazeno hêz û terefgîranê xo bi qeyûman Kurdîstan de cabikero. Sîstemê qeyûman vera şarê kurdî sey polîtîkayêka kolonyalîzmî yeno caardene. No rejîm hînî her cayî ra yeno vilakerdene. A raşte îqtîdar zaneno ke no sîstem heta peynî do nêeşko dewam bikero. Coka şaredarîyan visneno binê deynan ke eke kurdî şaredarîyanê xo apey bigêrê zî do nêeşkê îdare bikerê.''

Demîrî pare kerd ke şarê kurdî vera sîyasetê neteweya tirkan a homojene têkoşînê xo rê dewam keno. Demîrî vat: ''Destkewteyê 20 serran ê ke hetê têgêrayîşê azadîye ra ameyê afernayene, bi giranî serê şaredarîyan de ameyî cakerdene. Kurdîstan de bi qezençkerdişê şaredarîyan kurdî kewtî prosesêkê netewebîyayîşî ke hetê îdareyî ra hîna zaf bi xo bawer kenê. Dewleta tirke seba ke verê kurdan bigêrê polîtîkaya qeyûman viste dewre. Polîtîkaya qeyûmî rojane nîya, parçeyêkê polîtîkayanê çinkerdişê destkewteyanê kurdan o.''