Dewleta tirke reyna leşkerê xo yê tecawuzkar pawit. Efsero ke Wan de tecawuzê domanêke kerd derheqê ci de tehqîqat nêdîya destpêkerdene.

Wan de N.A. ya 17 serre ya ka şîdetê keyeyê xo ra remaye û şîye cayê mendişê  domanan, hetê esrefê tirkî û kesêkê bînî ra ameye tecawuzkerdene. Dima ke eşkera bi a digana dezgehê tehqîqatêk da destpêkerdene. Merkezê Çimarî yê Domanan (ÇIM)  îfadeyê N.A. girewt. N. A. îfadeyê xo de vat hetê kesêkê bi nameyê A.P.yî ra ameye tecawuzkerdene  û efsero bi nameyê T. A.yî dir zî pêvînayîş kerdî, keyeyê ey de mende û ey pêzor dest eşt aye.

Dima ke derheqê qewimîyayîşî de zanayîş dîya keyeyê N.A. înan Serdozgerîya Komare ya Wanî de gerre A.P.yî kerd. N.A. dozgerî rê vat: Min o efser T.A.yî dest pê vînayîşan kerd. Ê îçkî da mi şimitene. Virar şi mi ra û mi îstîsmarê cînsî rê maruz verda. N.A. gereyê leşkerê tecawuzkarî nêkerd. Dozgerîye qerar da ke seba ke ''rizaya ci esta'' do derheqê efserê tecawuzkarî de tehqîqat nêro destpêkerdene. Avûkato/a ka hetê CMKyî ra ame/ye wezîfekerdene vera nê qerarî vejîya û vat: Domane gerre mekere zî no îstîsmaro. Gerek derheqê ê efserî de pêhesnayîşê sûcî bêro kerdene ke o dozgerîye de îfade bido. Rixmê naye dozgerî derheqê efserî de tehqîqat nêda despêkerdene . Derheqê A.P.yî de qerarê tepiştişî ame dayene.