Serdozgerîya Komere ya Amedî derheqê Hemseraka Kongraya Cimatî ya Demokratîke (KCD) û Parlamentera Partîya Şaran a Demokratîke (HDP) ya Colemêrgî Leyla Guvene de seba ke  derheqê keyeyanê ke vernîya banê HDP’yî yê Amedî de roniştê de qisey kerdo  cipersayîş da destpêkerdene.

Guvene qiseykerdişê xo de wina vatbi: ‘‘Dayîkê ke uca ronişenê zî dayîkê ma yê. Dayîkî bimbarekê ma yê. Ma înan ra çîyêk nêvanê. Dayîkî ganî semedê ardişê haştîye tê bigêrê. Ewro di dayîkan rayapêrîye ra ozrê xo waşt û peyser ancîyayî. No do dewam bikero, cinkî sebebê şerî HDP nîyo. Zîhnîyeto ke meselaya Kurdî bêçare verdeno,  şerî o vejeno. Heta ke no dewam bikero do tewrbîyayîşê gerîlayî zî bibo, şer zî bibo, pêkewtişî zî bibê… HDP seba ke nê heme werta ra bêrê wedartene mucadele keno. Dayîkî ganî çareserîye yê ke şer wazenê berê înan de bigêrê. HDP roja ronayîşê xo ra semedê haştîye xebityeno.‘‘