Endamê Koordînasyonê Weçînayîşî yê Yewîya Hêzî ya Şorişgêre ya Dêrsimî Yusuf Topçuyî derheqê xebatanê înan de qisey kerd û va ma ber bi ber danê piro û muhîmîya weçînayîşî resnenê şarî û ma do 31’ê Adare de goşanê Enqere bikerê kerr.
Dêrsim de xebatê weçînayîşî bi hawayê berzî yenê kerdene. Goreyê Yusuf Topçuyî şar paştdarîye dano yewîya hêzî û bi kelecanîye 31’ê Adare ser vinderte yo. Topçu wina vano: “ Ma ber bi ber gêrenê û xebatê weçînayîşî kenê. No weçînayîş seba ma muhîmo û ma derheqê muhîmîya weçînayîşî de zanayîşanê xo şarî de pare kenê. Bajar de xebatê weçînayîşî bi bêvengîye yenê kerdene la şar bi kelecanîye 31’ê Adare ser vinderte yo.“
ŞAR YEWÎYA HÊZÎ RA ZAF ÇI PAWENO
Topçu vano rexneyê şarî estê û seba ke şaredarîye hîna baş bêro îdarekerdene şar pêşnîyazanê xo ano ziwan û wazeno ke Yewîya Hêzî ya Şorişgêre ya Dêrsimî 31’ê Adare de bibo serkewte. Reyna Topçu vano şar wazeno ke polîtîkayanê asîmîlasyon û tedayî ver pîya tê bigêro û naye ra zî wazeno ke Yewîya Hêzî ya Şorişgêre ya Dêrsimî hîna bibo pêt.
VENGÊ DÊRSIMÎ DO GOŞANÊ ENQERE BIKERO KERR
Topçuyî wina dewam kerd: “ Şar wazeno ke îradeyê xo şaredarîye de bivîno. Şarê Dêrsimî vera zorbazîya qeyûman wazeno ke şoro sandoqan ser û reya xo bido yewîya hêzî. Nê şarî vera zordarîye qetîya vileyê xo nêkerdo çewt, û o do çewt zî nêkero. Dêrsim 31’ê Adare de do bibo serkewte. Kuçeyanê Dêrsimî ra vengo winasî bivejîyo ke, o do goşanê Enqere bikero kerr. Şar do 31’ê Adare de cewabo munasîb bido qeyûman û Enqere.“
