20ê gulane de serê rayîrê qezaya Pulurî yê Dêrsimî de leşkeran gama ke kontrolê nasnameyî kerdêne çeke darte sereyê cinîyêke. Vera nê şîdetê dewlete yê biçeke nêrazîbîyayîşî zêdîyayî.

Dêrsimijan ra Denîz Zamurî vat: ''Cinîyêke erdî de qîrayêne. Şîdetê mergî ame kerdene. Ganî qet çew/e vera nê hêrişan bêveng memano. Ganî ma wurze payan ser. No serebûto verên nîyo. Bitaybetî no wexto ke polîs û leşkerî bajarê ma de zêdîyayî, ganî ma zanaye têbigêrê.''

Îbrahîm Talay zî vat: ''Nê qewimîyayîşî bizanayîş yenê kerdene. Vanê ma bi şikê bombaya ganîye hêriş kerdo û la yenê verê sereyê ci de çeke darene ci. Wazenî şarî bitersnê. Hol aya ke şarî vera leşkeran nêrazîbîyaîş ramojna. Eke wina nêbîyêne înan kerdişanê xo rê dewam kerdêne.''

Hemwelatîyan ra Selvîhane Gurkmen zî ard ziwan ke ganî hînî şîdetê dewlete yê vera merdiman bêro qedînayene û vat: ''Eke şar vera leşkeran mevejîyêne beno ke înan cinîye mirnayêne. Vera nê serebûtî ma zî qerqilîyenê.''

Nûrî Uçan zî vist vîrî ke 1938î ra nata şar raştê polîtîkaya zextî ya dewlete yeno û vat: ''Polîtîkaya zext û asîmîlasyonî dewam kena. Çeke darenê cinîyêke. Çîyo winayên nîno qebûlkerdene. Ganî ma nêrazîbîyayîş ramojnê.''

Serkan Çelebî zî bale ante ser ke pê hêrişanê winayênan wazenê komelî bigerî binê zextî û vat: ''La vera nayî şar bêveng nîyo, nêrazîbîyayîş ramojneno.''

Gulnaz Guç zî şîdetê vera cinîyan şermezar kerd û vat: ''Qey wina hêrişê şarê ma kenê? Eke bawerîya înan ma ra çîn a, wa memleketê ma ra şirê û reyna merê. Ganî ma vera serbûtanê winayênan dahîna bihêz bê.''

Lîza Karataş zî ard ziwan ke bi wedaritişê Pêkerdişê Îstanbulî verê şîdetê serê cinîyan ame akerdene û vat: ''Ganî wextanê winayênan de cinîyî paştî bidê yewbînan.''