Dêrsim de operasyonanê verba HDP'yî yê hewteyê vîyarteyî, ewro zî dewam kerd. Şaristan de serê sibayî ra polîsan eşt serê xeylî keyeyan.

Sereştişan de îdarekaro verên ê Partîya Herêmanê Demokratîkan (DBP) Celal Aydin, hemsereko verên ê şaristanî yê Partîya Şaran a Demokratîke (HDP) Murat Polat, îdarekarê HDP'yî Balaban Tûrgût û Cemal Gungormuş, endamê Meclîsê Pêroyî yê Şaristanî Mehmet Alî Yazir, îdarekarê Federasyonê Meclîsanê Sosyalîstan Mustafa Ataç, Ferîde Kit, Bêrîvan Kit Gungormuşe ameyî destbendkerdene.

Ame zanayene ke kesanê ke ameyî destbendkerdene ra Bêrîvan Gungormuşe wayîra domane ya hîrê aşmîya ya. 9 kesê ke sedemê destbendkerdişê înan nêno zanayene, ameyî berdene bi Mudirîya Asayîşî a Şaristanî. Ame zanayene ke Dêrsim de operasyonî dewam kenê û beno ke hûmara destbendkerdişan biba zêde.