Partîya Demokratîk a Şaran taxa Gazîkî ya Dêrsimî de buroyê weçînitişî yê cinîyan akerd. Akerdişî de seba roja cinîyan vengdayîş ame kerdene û parlanmenterê HDP’yî Pero Dundare, Kemal Bulbul, Alîcan Onlu , endamê HDP’yî, ESP, Partîzan, temsîlkarê EMEP’yî û xeylî hemwelatijî beşdarê ci bîyî.

MA DO TABELAYA DÊRSIMÎ NEWE RA DARDE BIKERÊ

Parlanmentera HDP’yî Pero Dundare bi vatişê Seyît Rizayî dest bi qiseykerdişê xo kerd û wina dewam kerd,  “Ê yê ke wazenê Dêrsimî bikerê Tuncelî do teber de bimanê. Persa ma na ya. Perse, ganî ma Dêrsimî teslîmê nê îqtîdarî, nê kesanê ke faşîzmî rê bîyê wasita nêkerê. Polîtîkaya ma ya weçînitişî bewlî ya, ma do qeyûmî tîya ra bivisnê û bierzê. Şîarê ma serkewtiş o. 8’ê Adare de zî, 21’ê Adare de zî, 31’ê Adare de zî ma do ser bikewê. Ma do tabelaya Dêrsimî newe ra darde bikerê.”

Dundare xoverdayîşê grevê vêşanîye yê Leyla Guvene silam kerd û qiseyê xo wina qedênayî: “Ma do tehêt de bibê, hêz bibê, ma do ser bikewê”.

MA DO ZÎHNÎYETÊ QEYÛMÎ SINDOQAN DE BIN BIFÎNÊ  

Namzeda hemşaredarî ya merkezî Nurşat Yeşîle ard ziwan ke Leyla Guvene seba ke welat de haştîye û demokrasî bibo 118 rojî yo grevê vêşanîye de ya. Yeşîle heme çalakwanê grevê vêşanîye silam kerdî û vat, “Tirkîye de 150 serrî tarîxê têkoşînê cinîyan esto. Cinîyan seba heqê ciwîyayîşî, heqê xebitîyayîşî û heqê wendişî dest bi xoverdayîşî kerd. Çîyê kê serdestî danê ci ney, heqê ke cinîyan bi têkoşînî kerdê ra xo dest estê. Muqaweleyê Stenbolî esto; pawitişê cuya cinîyan ser o muqaweleyêk. Tayê kesî wazenê ke no muqawele bêro îptalkerdene. Cinîyan nê oxirî de canê xo da, heta peynîye do têkoşîn bikerê.

Şaredarîyê ke şarî bi xo weçinitê qeyûman dest na ser. Hemserekê ma erzîyayî zîndanan. Di serrî verê cu şaredarîye de yewînê ma yê polîtîkayê cinîyan estbîyî. Qeyûman nê yewînî wedarnayî. Merkezê ma yê cinîyan ameyî padayene. Ma 31’ê Adare de şaredarîyan newe ra bigî û nînan newe ra do bierzê. Ma zîhnîyetê qeyûmî sindoqan de do bin bifînê.

 Aktîvîteyî, govendan, sloganan û tîlîlan reyde dewam kerd.