Dêrsim de Konferansê Ekolojî û Kulturî ame viraştene û de nê babetî ameyî qiseykerdene: 'Xozayo Yewin û Parzemîno Hewtin, Xirapkerdişê ekolojî yê Rojakewtena Deryaya Sîya û tesîrê ci yê kulturkî, têkoşînê ekolojî de cayê sistemê bawerîye yê Dêrsimî, meseleyê Mîras ê Kulturkî û Tabîîyî yê Dêrsimî, çareserîyî û têkoşîn'

Konferanso ke salonê şaredarîye de ame viraştene, akademîsyen Tayfun Atay, endamê Komîsyona Ekolojî  yê HDP'yî Cemîl Aksu, avûkatî Umît Aktaş û Bariş Yildirim sey qiseykerdox amade bîyî. Moderatorîya konferansî zî Av. Sennur Ayboga û Akademîsyen Bulent Bîlmez kerd. Konferans hetê Komeleya Kultur û Hunerî ya Akademîya Munzurî ra ame viraştene û temsîlkaranê partîyan û dezgahan, pîr û dadîyê Elewîyan, hunermendî û Serekê Şaredarîya Pîlemurîye Muslum Tosun, Serekê Şaredarîya Dêrsimî Fatîh Maçoglu û zafê hemwelatijî tewrê ci bîyî.

Endamê Komîsyona Ekolojîyî yê HDP'yî Cemîl Aksuyî behsa xirapkerdişanê ekolojîkî yê Rojakewtena Deryaya Sîya û têkoşînê verba nê texrîbatan kerde. Aksuyî derheqê têkoşînê wareyê ekeolojî de wina va: "Deryaya Sîya de projeyê turîzm û enerjî estbî la key sektorê enerjî pêşkêşê şîrketanê taybetan bîyî, her ca de xoverdayîşê ekolojîkî ameyî destpêkerdene. Projeyê HES û awbendîyan û truzmî ameyî amadekerdene. Îqtîdarî plan kerdêne ke Deryaya Sîya bike cenetê turîzmî, la sey proje mend."

Avûkat Umît Aktaş derheqê 'têkoşînê ekolojî de cayê sîstemê bawerîya Dêrsimî' de qisey kerd û bale ante ke têkoşînê ekolojî yê Dêrsimî ganî bawerîya Dêrsimî ra cîya nêro hesibnayene. Aktaş îfade kerd ke seba ke Dêrsim de koyî, kerrayî, awe ûsn fîraz ê ganî coka têkoşînê ekolojî yê verba xirapkerdişan bêro dewamkerdene.

Avûkat Bariş Yildirimî behsa girîngî ya tesîsan ê awguznayîşê gendawe û yê eşteyo huşk kerde û va: "3 dewanê Pulur de tahqîqatê awe de bakterî ameye dîyene ke neweşîyê sey menenjît, kolera û weba rê benê sebeb. Dêrsim wareyêko girîng o. Seba ke ma tîya bipawê, huqûq elzem o ke huqûqo bingeyên ma rê berpirsîyarîya pawitiş ê dormeyî dano." Konferans dimayê pers û cewaban qedîya.