Hêzanê Kede û Demokrasîyî yê Dêrsimî  Kuçeyê Sanatî de waşt ke bi eşkerayîya çapemenîye qedexeyê çalakîyan û aktîvîteyano ke 8 mengî yo yeno rayraberdene protsto bikero. Polîsan hêrişê şarî kerd.

Polîsan hêrişê kombîyayîşê çapemenîye kerd . Çalakwanan pê sloganan cewabê polîsan da û Kuçeyê Sanatî ra ver bi verê Merkezê Karî yê Şaredarîye rayra şîyî. Tîya eşkerayîye ameye dayene. Binameyê çalakwanan Hidir Yildizî qisey kerd.

Eşkerayîye de xoverdayîşê Unîversîteya Bogaziçi ame selamkerdene û bale ameye antene zextê serê bajaranê Kurdîstanî ser. Ame vîrardene ke dewleta tirke goreyê pêkedişanê huqûqê mîyanneteweyî tênêgêran û ame vatanê ke binê nameyê tedbîran de OHAL yeno rayraberdene. Reyna ame vîrardene ke îqtîdarî rê heme çalakî û aktîvîteyî serbestê la seba ke verê muxalefetî bigêrê çalakîyî û aktîvîteyî ê bînan rê qedexeyê. Eşkerayîye de ame vetane ke ê do sey hêzanê kede û demokrasîyî  vera na bêhuqûqîye û neheqîye bêveng memanê.