Dêrsim de Newroze siba saete 11.00 de Meydanê Seyîd Rizayî de do bêra fîrazkerdene. Xebata Komîteya Amadekarîya Newroze ya Dêrsimî dewam kena. Rêxistina HDPyî ya Dêrsimî şarî rê vilawekî vila kerdî û venga her kesî da ke wa tewrê şayîya Newroze bibo. Wekîlê HDPyî yê Dêrsimî Alîcan Onlu, Endamê Heyetê Rayberdişî yê Merkezî yê HDPyî Velî Saçilik, Sultane Ozcan, Partîya Kede û Hemşaredarê Dêrsimî F. Mehmet Maçoglu do tewrê şayîye bibê.

Endamê Komîteya Amadekarîye Îbrahîm Kasunî venga pêro hemwelatîyan da ke  ke bi şîarê 'Pê adirê Newroze xo ver bidê, azad bibê' tewrê Newroze bibê.

Kasunî vat: ''Wa her kes seba ke vera faşîzmî alaya xoverdayîş û azadîye berz bikero siba bêro Meydanê Seyîd Rizayî.'' 

Merkezê Pêroyî yê Komeleyanê Elewîyan ê Demokratîkan (DAD) zî bi eşkerayîyêke venga her kesî da ke tewrê şayîye bibo. DADî vat: ''Ewro şexsê îqtîdarî de Dehaqî gandar bîyî.Ma do sey ewladanê Raya Heqîye yewîya vera zulmî ra fek vera nêdê.''

Hetê bînî ra siba saete 10.00 de taxa Barişî ya Sêrtî de zî Newroze bêra fîrazkerdene. Wekîlê HDPyî yê Sêrtî  Merale Daniş Beştaş û Sidik Taş, hunermendî Hîvron û Şerzat do tewrê şayîye bibê. Hemserekê Komîteya Amadekarîye Mehmet Kaysiyî venga her kesî da ke wa tewrê şayîye bibo. Kaysiyî waşt ke wa hemwelatîyî pê kodê HESî bêrê warê şayîye.