Hamleya Pawitişê Mîrasê Tabî û Kulturelî yê Dêrsimî vera texrîbatê Parka Neteweyî ya Munzurî pê eşkerayîyêke nêrazîbîyayîşê xo mojna. Xeylêk temsîlkarê dezgeh û rêxistinanê xoza zî tewrê eşkerayîye bîyî.

Vervatoxê  Hamleya Pawitişê Mîrasê Tabî û Kulturelî yê Dêrsimî Bariş Yildirimî da zanayene ke Gelîya Munzurî serra 1971î ra nata yena texrîbkerdene. Yildirimî îfade kerd ke vera nê texrîbatî têkoşînê huqûqî dewam keno. Yildirimî vat: ''Xozaya ma pê dûyê mangalan, tepiştişê masêyan û awanîye texrîb bena. Ma her tim venga selahîyetdaran danê. Ganî qanûnê ke seba Parka Neteweyîye nusîyayî, bêrê caardene. La qanûnêk nêno caardene. Ma do vera nê texrîbatî têkoşînê xo dewam bikerê.''