Herêmê Amutka, Derekoy û Koçerî yê qezaya Xozatî ya Dêrsimî de 9ê Gulane de operasyonê leşkerî dîyayî destpêkerdene û  operasyonî ra dima leşkeran herême de şewat û şewat hema zî dewam keno. Semedê hewnakerdişê şewatî selahîyetdaran qet mudaxale nêkerd û reaksîyonê vera şewatî roj bi roje zêde beno.

 Hemsereka HDPyî ya Dêrsimî Ozleme Toprak derheqê babete de Jinnewsî rê qisey kerd.

 Ozleme eşkera kerd ke şewatê daristanan herême de polîtîkaya şerê taybetî ya û vat: "Selahîyetdarî nê mudaxeleyê şewatî kenê ne zî verdenê şar mudaxele bikero. No tewirê înan vera xoza û cografyaya kurdan dişmenî ya. Serranê 90an de dewî ameyî veşnayene, vengkerdene. Nika zî bi şewatê daristanan, wazenê wina bikerê. Şewatê daristanan parçeyêkê polîtîkaya şerê taybetî yo. Warê fîrazî yenê vêşnayene, gandarê daristanî yenê qetilkerdene. Ma ney qetî qebul nêkenê.''

Ozleme tewr peyêne wina vat: "Dewê ma, keyeyê ma veşnayî, rijnayî. La zorê ma nêberdî. Bi veşnayîşê daristananê ê nêeşkenê ma bêhêz bikerê. Çend ciwanê ma bîlasebeb ameyî qetilkerdene. Dewlete vana qey do bi veşnayîşê daristanan ma herra xo biteriknê. Sîstem bi serran o bi nê caardişan xoza qetil kena, bawerîyan çin kena. La se kenê wa bikerê do nêeşkê ma bêhêz bikerê. Şarê Dêrsimî rayêke zî milê xo nêardo wa û do nêaro.''